Aqtóbe oblysynyń ákimi Ashat Shaharov Coca-Cola Içecek Kazakhstan kompanııasynyń bas dırektory Velı Dınchel bastaǵan ókilderin qabyldady, dep habarlaıdy Egemen.kz.
Kezdesý barysynda taraptar kompanııanyń Aqtóbede tórtinshi zaýytyn salýǵa daıyndyq barysyn, ınjenerlik-ınfraqurylymdyq qamtamasyz etý máselelerin jáne jobany tabysty iske asyrý úshin qajetti jaǵdaılardy talqylady.
Ashat Shaharov halyqaralyq ınvestorlarmen uzaqmerzimdi yntymaqtastyqtyń mańyzdylyǵyn atap ótip, Aqtóbe oblysynyń eleýli ekonomıkalyq jáne ónerkásiptik áleýetke, sondaı-aq ınvestısııalar úshin qolaıly jaǵdaılarǵa ıe ekenin aıtty.
«Biz Coca-Cola-nyń jańa zaýytynyń qurylysy óńir ekonomıkasynyń damýyna qýatty serpin berip, jańa jumys oryndaryn ashatynyna jáne zamanaýı ekologııalyq taza tehnologııalardy engizilýine yqpal etedi degen senimdimiz. Biz jobany iske asyrýdyń barlyq kezeńinde jan-jaqty qoldaý kórsetýge daıynbyz», dedi óńir basshysy.
Ákimniń sózinshe, óńirdiń Túrkııa Respýblıkasymen yntymaqtastyǵy oń dınamıkany saqtap keledi. Bıylǵy jyldyń toǵyz aıynda Aqtóbe oblysynyń Túrkııamen syrtqy saýda aınalymy 71,2 mln AQSh dollaryn qurady, onyń 58,4 mln dollary - eksportqa, 12,8 mln dollary - ımportqa tıesili.
О́z kezeginde Velı Dınchel jobanyń óndiris kólemin ulǵaıtýǵa jáne kompanııanyń Qazaqstandaǵy naryqtyq ornyn kúsheıtýge aıyryqsha úles qosatynyn alǵa tartty.
Zaýyt qurylysyna oblys ákimdigi Aqtóbe qalasyndaǵy Ońtústik aınalma joly boıynan 25 gektar jer telimin usyndy. Qurylys jumystary 2026 jyly bastalady dep josparlanǵan. Nysan paıdalanýǵa berilgennen keıin 120-dan astam jańa jumys orny ashylady. Kásiporyn ekologııalyq taza tehnologııalardy jáne qaldyqtardy basqarýdyń halyqaralyq standarttaryn qoldanady, bul ony óńirdiń turaqty óndiristik ekojúıesine ıntegrasııalaýǵa múmkindik beredi.
Aıta keteıik, Aqtóbe oblysynda túrik ınvestorlarynyń qatysýymen júzege asyrylyp jatqan jobalar bar. Sonyń ishinde S Sistem Lojistik Ltd. kompanııasy jylyna 12 myń tonna qýattylyqpen, 19 mlrd teńge ınvestısııa kólemimen, 180 jumys ornyn qurýdy qarastyratyn kólik-logıstıkalyq hab qurylysyn júrgizip jatyr.