Qazaqstandaǵy eń júktemesi joǵary jáne strategııalyq mańyzy bar kólik arterııalarynyń biri –Samara-Shymkent avtomobıl joly. Jyl basynan beri osy jolda 101 jol-kólikoqıǵasy oryn alyp, 41 adam qaza boldy, 200-den astam adam jaraqat aldy, dep habarlaıdy Egemen.kz.
Apattardyń basty sebebi – júrgizýshilerdiń jol qozǵalysy erejelerin saqtamaýy.
Qaıǵyly jol apattary azaımaı otyrǵan bul trassaǵa búgin Aqtóbe oblysy polısııa departamentiniń basshysy Abaı Jýsýpov jumys saparymen shyǵyp, joldaǵy jaǵdaımen jeke tanysty. Ol júrgizýshilermen, ásirese jolaýshylar tasymaldaıtyn avtobýs, taksı júrgizýshilerimen, júk kóligin basqarýshylarmen sóılesip, júrgizýshilik tártip pen qaýipsizdik erejelerin eske saldy. Sonymen qatar, polısııa basshysy olardyń jol sapasyna, qozǵalysty uıymdastyrýǵa jáne aqparattyq belgilerge qatysty usynystary men eskertýlerin de tyńdady.
«Bul jol ýchaskesinde jol-kólik oqıǵalarynyń basty sebebi – júrgizýshilerdiń qarsy baǵytqa shyǵýy, jyldamdyqty asyrýy jáne araqashyqtyqty saqtamaýy. Biz óz tarapymyzdan azamattardyń qaýipsizdigi úshin eń tıimdi, áseri bar degen sharalardyń barlyǵyn qabyldap jatyrmyz. Mysaly, patrýldik jasaqtardyń tyǵyzdyǵy artty, jasyryn baqylaý kúsheıtildi, joldyń ýaqytsha taryltý tásili, drondarmen baqylaý qoldanylady. Degenmen, júrgizýshilik tártip bolmasa, eshbir sharamen oń nátıjege jetý múmkin emes», dedi Abaı Júsipov júrgizýshilerge.
Sapar barysynda polısııa basshysy joldaǵy patrýldik polısııa narıadtarynyń jumysyn, blok-bekettiń qyzmetin tekserdi.
Búgingi kúni Samara-Shymkent avtojolynda stasıonarlyq polısııa beketteri jumys istep tur, olar jol erejeleriniń saqtalýyn baqylap, qaýip týyndaǵan jaǵdaıda jedel áreket etedi. Bul rette, apatty jaǵdaı týǵyzýshylar áýe arqyly da anyqtap jatyr. Drondar, ásirese, basyp osý erejelerin buzǵan, qarsy baǵytqa shyqqan júrgizýshilerdi anyqtap jatyr.