Iri jobaǵa «Alel Agro» aksıonerlik qoǵamy 19,8 mlrd teńge ınvestısııa quıǵan. Investısııalyq joba Memleket basshysynyń agroónerkásip keshenin damytý, óńdeýdi tereńdetý jáne qaıta óńdelgen ónim úlesin arttyrý jónindegi tapsyrmalary aıasynda júzege asyrylyp otyr, dep habarlaıdy Egemen.kz.
Zaýytta álemdik jetekshi kompanııalardyń zamanaýı jabdyqtary ornatylǵan, barlyq tehnologııalyq úderister halyqaralyq standarttarǵa saı júrgiziledi. Bul ónim sapasyn turaqty baqylaýǵa jáne óndiristik qaýipsizdiktiń joǵary deńgeıin qamtamasyz etýge múmkindik beredi.
«Alel Agro» AQ-nyń Jambyl fılıaly – qus sharýashylyǵy salasyndaǵy jetekshi kásiporyndardyń biri. Negizgi baǵyty – broıler tuqymdy qustardyń etin óndirý jáne qaıta óńdeý. Kompanııa tolyq óndiristik sıkldi júzege asyrady: balapandardy ınkýbasııalaýdan bastap, qusty ósirý, et óndirý jáne daıyn ónimdi naryqqa shyǵarý kezeńderiniń barlyǵyn qamtıdy.
Kásiporynnyń qazirgi qýaty – jylyna 10 myń tonna qus eti. Qazirgi tańda zaýyt basshylyǵy óndiris kólemin ulǵaıtý jáne tıimdilikti arttyrý maqsatynda zamanaýı tehnologııalardy, óndiristik ınfraqurylymdy engizip otyr.
«Alel Agro» AQ-nyń Jambyl fılıaly 2019 jyly jumysyn bastady. 2020 jyly jylyna 10 myń tonna ónim óndiretin et óńdeý kesheni ashyldy. 2021 jyly qýaty 10 myń tonna bolatyn eki broıler qus fabrıkasy, al 2022 jyly jylyna 84 myń tonna quramajem óndiretin zaýyt iske qosyldy. 2023 jyly jylyna 13,5 mln táýliktik balapan shyǵaratyn zamanaýı ınkýbator paıdalanýǵa berildi.
Bıyl jyl sońyna deıin qýaty 4 600 tonna bolatyn úshinshi broıler fabrıkasynyń iske qosylýy josparlanǵan. Sondaı-aq jalpy qýaty 26 myń tonna bolatyn eki jańa fabrıkanyń qurylysy bastalady. 2028 jyly taǵy eki fabrıkanyń qurylysy qolǵa alynyp, sol jyldyń sońyna qaraı kásiporynnyń jalpy jyldyq qýaty 69 myń tonna qus etin óndirýge jetedi. Bul oblystaǵy qus eti óndirisin eki esege arttyrýǵa jol ashady.
О́ńirde qus sharýashylyǵy baǵytynda úsh iri kásiporyn jumys isteıdi. Onyń ekeýi – qus etin óndirý («Áýlıe-Ata Fenıks» JShS, «Alel-Agro» AQ Jambyl fılıaly), bireýi – jumyrtqa óndirý («Asa-Damý» JShS).
2025 jyldyń 9 aıynda oblysta 3 327,4 tonna et jáne 421 tonna shujyq ónimderi eksporttaldy. Onyń ishinde qus eti – 1 721,5 tonna, sıyr eti – 675,1 tonna, qoı eti – 1 188,7 tonna, jylqy eti – 0,3 tonna, maldyń ishki ónimderi – 760,9 tonna. О́nim Qyrǵyzstan, Qatar, Kýveıt, BAÁ, Reseı, Saýd Arabııasy, Iran jáne Germanııa elderine shyǵaryldy.