ASTANA. 20 aqpan. Shveısarııada poıyzdardyń soǵysýy saldarynan eki sostavtan birneshe vagon relsten shyǵyp ketti. Bul týraly Shveısarııa federaldy temir joldar men jergilikti polısııa ókilderiniń derekterine silteme jasaǵan VVS (Bı-bı-sı) radıostansasy habarlady.
Apat jergilikti ýaqyt boıynsha tańǵy 6:45 saǵat shamasynda Sıýrıhtiń soltústik jaǵynan 30 shaqyrym jerdegi Rafs degen kommýna tusynda oryn alǵan. Reıter aqparat agenttiginiń dereginshe, kem degende 49 adam zardap shekken.
Aldyn ala málimet boıynsha, soqtyǵysý Rafstan Shaffhaszenge qaraı shyqqan qalaaralyq sostavy men Sıýrıhke bet alǵan júrdek poıyz arasynda bolǵan.
Qazirgi tańda jelide poıyzdardyń qozǵalysy qıyndap tur. Shveısarııa temir jolynyń basshylyǵy osy baǵyttarǵa qosymsha jolaýshylar avtobýstaryn attandyryp úlgerdi.
Apat bolǵan jerde qutqarýshylar jumys jasap jatyr. Bılik sondaı-aq barlyq aımaqtardan medısınalyq brıgadalardy jetkizýde.
Murat Aıtqoja.