ASTANA. 8 tamyz. Búgin Germanııadan velosıpedpen shyqqan nemis saıahatshysy Astanaǵa jetti. Energııamen jabdyqtaý, ortalyqtan jylytý jáne telekommýnıkasııalar salasyndaǵy «jasyl» tehnologııalarmen aınalysatyn RTS nemis kompanııasynyń qyzmetkeri Folker Shtıýveniń mundaı sapar jasaýdaǵy maqsaty – EKSPO-2017 kesheniniń nysandarymen tanysý. Shildeniń basynda ol týǵan qalasy Bılefeldten (Germanııa) shyǵyp, Astanaǵa deıingi 5 200 shaqyrymdyq joldy jarys velosıpedimen júrip ótti. Bul týraly egemen.kz habarlady.
Velosıpedshi 40 kúnge sozylǵan saıahatyn 4 shilde kúni RTS kompanııasynyń Bılefeldtegi shtab-páterinen bastady. Baltyq elderi men Reseı aýmaǵyn basyp ótken ol 8 tamyzda Astanaǵa jetti. Ony «Ekaterınbýrg-Astana» tasjolynda bir top jergilikti velosıpedshi qarsylap, elordanyń ortalyq kóshelerimen alyp júrdi. Saıahatyn kórmeniń qurylys alańynda aıaqtaǵan Shtıýveni ol jerde «Astana EKSPO-2017» ulttyq kompanııasynyń ókilderi kútip aldy.
«Biz sizdi EKSPO-2017 aýmaǵynda qarsy alyp turǵanymyzǵa qýanyshtymyz. Siz ekologııalyq taza kólik jáne jasyl tehnologııalar dáýiri bastalǵanynyń jarqyn úlgisin kórsetip otyrsyz. Astanada ótkiziletin kórme tájirıbe almasý men ınnovasııalyq jetistikterdi kórsetýge arnalǵan jahandyq alańǵa aınalatyn bolady», – dep atap ótti «Astana EKSPO-2017» ulttyq kompanııasynyń ókili Sáýle Bólebaeva.
Sondaı-aq, qurylystyń qarqyny týraly áńgimelegen ol qonaqqa arnaıy estelik syılyqtar tabys etti. Odan bólek, nemis velosıpedshisi salynyp jatqan nysandarmen tanysyp, keshendi aralap kórdi.
Velojoryqtyń sońǵy 100 shaqyrymynda Shtıývege onyń áriptesi, RTS kompanııasynyń basshysy Dırk Shaýmbýrg qosyldy. Kompanııanyń geotermaldy jylýmen qamtamasyz etetin ónimi EKSPO-2017 nysandar qurylysynda paıdalanylady dep josparlanǵan.
«Qushaq jaıa qarsy alyp, ekskýrsııa uıymdastyrǵandaryńyz úshin alǵys bildiremin. Qazirdiń ózinde EKSPO-2017 jobasy óziniń aýqymymen jáne maqsaty bıik josparlarymen tańqaldyrýda. Sondyqtan eki jyldan keıin otbasymmen Astanaǵa mindetti túrde kelemin», – deıdi Folker Shtıýve.
Elaman Qońyr.
Derek: egemen.kz.
Sýret: expo2017astana.com.