Prezıdent qatysýymen ótken forým barysynda biz birsypyra tájirıbe almasyp, ózara pikir bólistik. Sondaı-aq alda atqarylatyn jumystar boıynsha naqty tapsyrmalar berildi.
Burynǵy kezeńmen salystyrǵanda, qazir saılanbaly júıemen ákim bolyp otyrǵanymyzdyń ózi – halyqtyń talabyna jaýap beretin, halyqqa qulaq asatyn memleket qurýdyń mańyzdy qadamy.
Búgingi forýmda da osy baǵyttaǵy naqty saıasatty júzege asyrý jóninde kúrdeli máseleler talqylandy. Sonyń ishinde erekshe atap ótetin jaıt – Prezıdentimizdiń bastamasymen júrgizilip jatqan «Taza Qazaqstan» ekologııalyq aksııasy. Bul bastamany búkil el qoldap jatyr, biz de aýyl turǵyndarymen birge belsene atsalysyp kelemiz. Halyqtyń bul iske belsendi aralasýy úlken jetistik dep oılaımyn.
Forýmda basqa da ákimder óz oılarymen bólisip, aýyl ákimderine motıvasııa beretin jaqsy usynystar aıtty. Bul – biz úshin úlken kórsetkish. Barlyǵymyzdyń ortaq maqsatymyz – halyqtyń turmysyn jaqsartýǵa úles qosý. Memleket basshysynyń «Aýyl amanaty» baǵdarlamasy aıasynda da kóptegen otbasynyń jaǵdaıy túzelip keledi. 2,5 paıyzdyq nesıe arqyly aýyl turǵyndary óz kásibin ashyp, damytyp jatyr. Bul kásiptiń órkendeýine ǵana emes, aýyldyń kiris kózin ulǵaıtýǵa da zor serpin berip otyr.
Sonymen qatar forýmda aýyl ákimdikteriniń kiris kózin kóbeıtý máselesi de qozǵaldy. Buǵan deıin aýdandyq nemese oblystyq bıýdjetke túsip kelgen keıbir kiristerdi aýyl ákimdiginiń qaramaǵyna berý jóninde tapsyrmalar berildi. Bul qadam aýyl ákimdikteriniń ózdiginen damýyna úlken múmkindik týǵyzbaq.
Aýyl ákimderiniń saılanbaly júıesine kelsek, bul – óte durys qadam dep sanaımyn. О́zim Qordaı aýyldyq okrýgine ekinshi ret saılanyp otyrmyn. Buryn keıbir turǵyndar aýyl ákimin múldem tanymaıtyn. Al qazirgi júıe boıynsha túrli kandıdattar shyǵyp, halyq olarmen tanysady, olardyń baǵdarlamalaryn zerdeleıdi. Keıin sol baǵdarlamalardyń oryndalýyn aýyl turǵyndarynyń ózderi baqylaı alady.
Ádilet QASPAQBAEV,
Qordaı aýyldyq okrýginiń ákimi
Jambyl oblysy,
Qordaı aýdany