Meniń memlekettik qyzmetke kelgenime eki jarym jyl boldy. Buǵan deıin Astanada 20 jyl jeke kásippen aınalystym. Aýylǵa qyzmet etý – ár azamattyń paryzy dep bilemin. Sol sebepti de elordada kásibim bola tura, týǵan jerge tý tigýdi kózdep, ósken ólkege de bir eńbek sińireıik degen perzenttik jaýapkershilikpen aýylǵa at basyn burdym.
Men «Amanat» partııasynyń qoldaýymen 2022 jyldyń 20 qarashasynda aýyl ákimi bolyp saılandym. Aýylǵa qyzmet etýge kelýdegi basty maqsatym aýlymyzdyń kórkeıýine úles qosyp, turmysyn damytý boldy. Keıingi úsh jarym jylda aýylda birqatar mańyzdy jumys atqaryldy. Ásirese jol máselesi – bizde óte ózekti de basty basymdyqtardyń biri. Bıyl 42 shaqyrymdyq Aıagóz – Shynqoja – Aqsháýli baǵytyndaǵy joldyń 15 shaqyrymy tolyq asfalttaldy. Qalǵan bóligi de kezeń-kezeńimen aıaqtalady dep senemiz.
Mádenıet úıi, sport zal, HQO, kitaphana kúrdeli jóndeýden ótip jatyr. Aýylymyzdaǵy 11 jyldyq mekteptiń jumysyn saqtap qalý úshin óz otbasymmen birge aýylǵa kóship keldim. Bes balam da osynda oqyp júr. Bul – aýyl mektebiniń jabylmaýyna qosqan úlesim.
Búgingi forým óte paıdaly boldy. Jańa tásilder, aldaǵy josparlardy iske asyrý joldary boıynsha kóp tájirıbe aldyq. Aýyl úshin eń basty máseleler – ınternet, jaryq, jol, aýyzsý. Bizde sý júıesi tolyq tartylǵan, kóshelerdiń barlyǵy jaryqtandyrylǵan. Kelesi jyly aýylǵa talshyqty ınternet júrgizý josparlanyp otyr. Sonymen qatar kún qýatymen jumys isteıtin jaryqtandyrý júıesin engizýdi kózdep otyrmyz.
Aýyl sharýashylyǵy, ınfraqurylym jáne basqa da salalardy damyta otyryp, aýyldyń tabıǵı ereksheligin eskere kele týrızmdi de damytýdy josparlap otyrmyz. 2026–2028 jyldary demalys oryndary men tarıhı nysandardy abattandyrý arqyly jańa jumys oryndaryn ashý oıymyzda bar.
Jalpy, mundaı forýmdar jıi ótse, halyq pen bılik arasyndaǵy baılanysty nyǵaıtady. Al biz – osy eki ortany baılanystyratyn kópirmiz. Munda aıtylǵan josparlardy júzege asyrý úshin aldaǵy ýaqytta da barymyzdy salyp jumys isteı beremiz.
Jánibek TORTAEV,
Aqsháýli aýyldyq okrýginiń ákimi
Abaı oblysy,
Aıagóz aýdany