Syrtqy ister mınıstri Ermek Kósherbaev pen Eýropalyq odaqtyń syrtqy saıasat jónindegi joǵary ókili Kaıa Kallastyń tóraǵalyǵymen «Qazaqstan – Eýropalyq odaq» yntymaqtastyq keńesiniń 22-shi otyrysy ótip, taraptar sońǵy on jyldaǵy seriktestiktiń jetistikterin saralap, aldaǵy basymdyqtardy aıqyndady, dep habarlaıdy Egemen.kz.
Jıyn Qazaqstan men Eýropalyq odaq arasyndaǵy Keńeıtilgen seriktestik pen yntymaqtastyq týraly kelisimge qol qoıylýynyń on jyldyǵyna oraı ótkizilýimen erekshe aıshyqtaldy. Kezdesýde Astana men Brıýsseldiń strategııalyq áriptestigi sońǵy onjyldyqta berik qalyptasyp, kóptegen baǵyttarda naqty nátıjeler bergeni atap ótildi.
Taraptar ekonomıkalyq baılanystardyń seriktestiktiń negizgi tiregi ekenin rastady.
«Eýropalyq odaq Qazaqstannyń eń iri saýda jáne ınvestısııalyq seriktesi mártebesin saqtap otyr. 2024 jyly ózara taýar aınalymy 50 mlrd AQSh dollaryna jaqyndady, al eýropalyq ınvestısııalardyń jalpy aǵyny 200 mlrd AQSh dollaryna jetti. Elde eýropalyq qatysýy bar 4 myńnan astam kompanııa jumys isteıdi. Qazaq tarapy saýdany odan ári ártaraptandyrýǵa daıyn ekenin bildirip, otandyq aýyl sharýashylyǵy ónimderiniń EO naryǵyna qol jetkizýin keńeıtýdiń mańyzdylyǵyn atap ótti», dep habarlady Syrtqy ister mınıstrliginiń baspasóz qyzmeti.
Kelissózderde Transkaspıı halyqaralyq kólik baǵytyn («Orta dáliz») damytý máselesi keńinen talqylandy. Ǵalamdyq jetkizý tizbekteriniń transformasııasyn eskere otyryp, taraptar bul baǵyttyń Eýropa men Azııa arasyndaǵy senimdi ári turaqty kólik dálizi retindegi strategııalyq mańyzyn rastady.
Qazaqstan bul korıdordy odan ári damytý úshin EO jáne óńirlik seriktestermen yntymaqtastyqty tereńdetýge daıyn ekenin jetkizdi.
Sonymen qatar «jasyl» jáne sıfrlyq transformasııa salasyndaǵy yntymaqtastyq jeke taqyryp retinde qaraldy. Taraptar bul baǵyttardyń Qazaqstan ekonomıkasyn jańǵyrtýǵa jáne Eýropa ónerkásibiniń ornyqtylyǵyn arttyrýǵa úles qosatynyn jetkizdi.
Otyrysqa qatysýshylar parlamenttik yntymaqtastyqtyń mańyzyn da atap ótip, qarasha aıynda Brıýsselde ótken «QR – EO» parlamenttik yntymaqtastyq komıtetiniń 22-shi otyrysynyń tabysty ótkenin joǵary baǵalady.
Adamdar arasyndaǵy baılanystardy kúsheıtý de kún tártibinen túsken joq. Taraptar 2 jeltoqsanda Brıýsselde Qazaqstan azamattary úshin EO vızalyq talaptaryn jeńildetý jáne readmıssııa máseleleri boıynsha kelissózderdiń bastalýyn qoldap, bul qadam bilim, ǵylym, kásibı damý jáne azamattardyń mobıldigin keńeıtýge serpin beretinin atap ótti.
О́ńiraralyq yntymaqtastyq turǵysynan 2025 jylǵy sáýirde Samarqandta ótken «Ortalyq Azııa – EO» alǵashqy sammıtinde qabyldanǵan tarıhı sheshim erekshe atalyp ótti. Onyń nátıjesinde bul format resmı túrde strategııalyq seriktestik deńgeıine kóterildi.
Taraptar 29 ózara is-qımyl baǵytyn qamtıtyn Keńeıtilgen seriktestik pen yntymaqtastyq týraly kelisimniń tıimdi jumys istep kele jatqanyn jáne ózara senimniń nyǵaıýyna berik negiz bolǵanyn tilge tıek etti.
Otyrys qorytyndysynda Ermek Kósherbaev pen Kaıa Kallas saıası dıalogty odan ári nyǵaıtýǵa, saýda men ınvestısııalardy damytýǵa, óńirlik ózara baılanystylyqty arttyrýǵa jáne gýmanıtarlyq saladaǵy yntymaqtastyqty tereńdetýge beıildi ekenderin aıtty.