Munaıly óńirde sport keshenderi az emes. Sport seksııalary da jeterlik. Alaıda atyraýlyq sportshylar arasynan taekvondoshy Arman Shylmanov pen paradzıýdoshylardan ózgeleri Olımpııa oıyndarynyń jeńimpazy, tipti júldegeri atana almaı júr.
Oblys ákimi Serik Shápkenovtiń aıtýynsha, aldaǵy eki jylda aýyldyq okrýgterdiń bárin sporttyq ınfraqurylymmen qamtamasyz etý kózdelip otyr. Qazir óńirde 800 sport nysany bar. Onyń ishinde 8 stadıon, 53 sport kesheni, 702 sport alańy, 50 metrlik olımpıadalyq basseın, «Atyraý» sport saraıy, tennıs ortalyǵy men muz saraıy syndy iri nysandarǵa kelýshiler qatary kóbeıgen. Sondaı-aq 17 jeke sport nysany áýesqoı sportshylardyń qyzyǵýshylyǵyn týdyryp otyr.
«Jyl sońyna deıin 68 aýyldyq okrýgtiń 70%-y sport nysanymen qamtylady. Qazir oblys aýmaǵynda 29 sport kesheniniń qurylysy júrgizilip jatyr. Onyń jeteýi paıdalanýǵa berildi, taǵy alty nysannyń qurylysy aıaqtalýǵa jaqyn. Aldaǵy jyly 16 nysandy iske qosý josparlanyp otyr. Qazir Atyraý qalasy men aýdandarda demeýshilerdiń esebinen tórt sport nysany salynyp jatyr. Onyń qatarynda mamandandyrylǵan voleıbol, basketbol ortalyqtary, Muqyr men Kýdrıashov aýyldaryndaǵy sport keshenderi bar», deıdi S.Shápkenov.
Ákimniń deregine qaraǵanda, osyndaı jobalardy iske asyrý nátıjesinde turǵyndardyń sporttyq ınfraqurylymmen qamtylý deńgeıi 62%-dan 70%-ǵa jetedi. О́ńirde daryndy balalarǵa qoldaý kórsetý jan-jaqty kózdelgen. Osy maqsatta Atyraý qalasynda olımpıadalyq rezerv mektep-ınternatynyń ǵımaratyn salý josparlanǵan. Alaıda atalǵan jobany iske asyrýǵa alty jyl qajet. О́ıtkeni memlekettik-jekemenshik áriptestik aıasynda 12 aıǵa sozylatyn bul nysannyń qurylysy 2026 jyldyń sáýirinde bastalady. Al bes jyl – tehnıkalyq paıdalaný kezeńi. Keshen quramynda 13 sport zaly, basseın, oqý korpýsy, jataqhana, ashana, kitaphana, basqa da ıgilikter bolady. Munda 12 olımpıadalyq sport túrinen 400 sportshy bilim alyp, sheberligin shyńdaıdy.
«Memleket basshysynyń Ulttyq quryltaıda bergen tapsyrmalaryna sáıkes, Atyraý oblysynda halyqaralyq deńgeıdegi jarystar ótkizýge múmkindik beretin iri sporttyq jobalar iske asyrylady. Sondaı jobalardyń qatarynda ulttyq at sporty kesheni (ıppodrom), 12 myń oryndyq Euro-IV sanatyndaǵy fýtbol stadıony men kópbeıindi «Atyrau Arena» sport kesheni bar. Qazir bul nysandar jónindegi jobalaý jumystary aıaqtaldy. Endi memlekettik saraptamadan ótý kezeńi júrip jatyr. Qurylysty kelesi jyly bastaý josparlanyp otyr», dedi oblys ákimi.
Resmı málimetterge súıensek, oblys turǵyndarynyń dene shynyqtyrýmen júıeli shuǵyldaný kórsetkishi 45,1%-dy quraıdy. Bul az ba, kóp pe? Qansha degenmen munaıly óńirde Olımpııa oıyndary sekildi dúbirli dodalarda el namysyn qorǵaıtyn sportshylar ázirge kóriner emes.
Jaqynda kúresten álem, Azııa chempıony Rızabek Aıtmuqannyń esimi berilgen sport kesheni paıdalanýǵa berildi. Jańa nysannyń ashylýyna qatysqan Qazaqstannyń eńbek sińirgen qaıratkeri, dańqty balýan, Májilis depýtaty Dáýlet Turlyhanovtyń aıtýynsha, munaıly óńirde erkin kúreske den qoıǵan jasóspirimderge úlken múmkindik týyp otyr. О́ıtkeni zamanaýı keshen – buqaralyq sportty damytýǵa, jattyǵý alańdaryn keńeıtýge baǵyttalǵan mańyzdy qadam.
«Atyraý – «qara altynymen» ǵana emes, belgili sportshylarymen de tanymal óńir. Osyndaı sport akademııalary kóbeıse, elimizdiń atyn álemge shyǵaratyn sportshylar qatary artatyny daýsyz. Talantty sportshylardy qoldaý qajet. Bul turǵyda osy zaman talabyna saı sport keshenderin kóbirek ashý qajet», deıdi D.Turlyhanov.
Oblystyq dene shynyqtyrý, sport jáne týrızm basqarmasynyń málimetine qaraǵanda, munaıly Atyraýda kúres túrleri keń qanat jaıyp keledi. Qazir erkin kúreske baýlıtyn 197, grek-rım kúresinen 96 seksııa jumys isteıdi. Seksııalarda tórt myńnan astam bala atalǵan sport túrlerimen turaqty shuǵyldanady. Alaıda keıingi jyldary grek-rım kúresiniń balýandary iri jarystarda jaqsy nátıje kórsete almaı júr. Al erkin kúres sheberleri Azııa, álem chempıonatynan tek eki medalǵa ıe boldy.
«Keıingi jyldary jergilikti balýandardyń halyqaralyq, respýblıkalyq saıystarda kórsetip júrgen nátıjesi kóńil kónshitpeıdi. Elimiz chempıonatynda erkin kúres sheberleri 2023 jyly 11 medal jeńip aldy. Byltyr medal sany beseýge kemidi. Grek-rım kúresiniń sheberleri úsh medaldy enshileýmen shekteldi. Ulttyq qurama sapyndaǵy atyraýlyq sportshylar sany erkin kúresten 19-dan 14-ke kemidi. Grek-rım kúresinen 11-den 6-ǵa deıin azaıdy», deıdi basqarma basshysy Nurbol Sydyqov.
О́ńirde dzıýdodan eki Olımpıadaǵa qatysqan bir balýan bar. Ol – Rınat Ibragımov. Aldymen 2008 jyly Beıjińde, keıin 2012 jyly Londonda ótken Olımpıadada baq synady. Qazirde 105 jattyqtyrýshy jasóspirimderdi dzıýdo sportyna baýlyp júr. Onyń ishinde 52 jattyqtyrýshy aýyldarda turady. Shtattyq rejimde 85 jattyqtyrýshy jumys isteıdi. Búginde 4401 atyraýlyq jas óren dzıýdo sportyn tańdapty. Balalar men jasóspirimder sport mektepterinde 3033, olımpıadalyq rezerv daıarlaý ortalyǵynda 52 bala jattyǵady. Joǵary sport sheberligi mektebinde 37, sport ınternatynda 79 sportshy, «Damýbala» baǵdarlamasy arqyly 1200 bala tegin sporttyq seksııalarǵa tartylǵan.
Jergilikti sportshylardan qaıran bolmady ma, keıingi jyldary jergilikti bapkerler Ábıba Ábýjaqynova men Esmıgúl Kýıýlovaǵa úmit artyp, Parıj Olımpıadasyna qosty. Byltyr ulttyq qurama sapyna 22, bıyl 23 atyraýlyq dzıýdoshy tirkelipti. Alaıda eki Olımpıadaǵa qatysqan Rınat Ibragımov pen Parıjde tatamı tórine shyqqan qos arýdyń izin jalǵar bilekti balýan áli tabylmaı tur.
Basqarma basshysynyń pikirinshe, kúres túrlerine bilikti mamandardy tartý qajet. Jergilikti balýandardyń sheberligin shyńdaýǵa mán berilgeni jón. Sporttyń ózge túrlerinde de osyndaı qadamdar jasalýy qajet. О́ıtkeni atyraýlyqtar óńir sportyn alǵa bastyrar tyń talpynystardy, Olımpıada shyńyn baǵyndyrar sańlaqtardy kútkeli biraz jyl boldy.
Atyraý oblysy