Qazaqstannyń Bas prokýratýrasy alaıaqtardyń jumys taktıkasyn ózgertip jatqany týraly mańyzdy málimdeme jasady. Jaýapty organ alaıaqtardyń jańa ınternet-shemasy týraly halyqty eskertti, dep habarlaıdy Egemen.kz.
Bas prokýratýranyń Quqyqtyq statıstıka jáne arnaıy esepke alý jónindegi komıtetiniń Qylmystyq qaýipter men qoǵamdyq qaýipsizdik táýekelderin boljaý ortalyǵy jańa ınternet-alaıaqtyq shemasy týraly habarlaıdy.
Sheteldik derekkózderge súıensek, alaıaqtar shabýyldyń jańa tolqynyn bastaǵan:
Olar endi jetkizý qyzmetteriniń, basqarýshy kompanııalardyń jáne bankterdiń atynan hattar men SMS habarlamalar taratady.
«Avtorızasııadaǵy qate», «domofondy aýystyrý» nemese «eseptegishterdi tekserý» sııaqty syltaýlardy alǵa tartyp, azamattardy ózderine qaıta qońyraý shalýǵa májbúrleıdi.
Nátıjesinde, eshteńeden kúdiktenbegen azamattar kıber-alaıaqtarǵa áleýmettik ınjenerııa quraldaryn qoldanýǵa múmkindik jasaıdy.
Osyǵan baılanysty Bas prokýratýra qazaqstandyqtarǵa kıberqaýipsizdikti saqtaý úshin kelesi sharalardy oryndaýdy usynady:
1. Qyraǵy bolyńyz: Belgisiz kiris habarlamalar men qońyraýlarǵa syn kózben qarańyz.
2. Tek resmı nómirlerge qońyraý shalyńyz: Tek uıymdardyń saıttarynda kórsetilgen resmı nómirlerge ǵana qaıta qońyraý shalyńyz.
3. Eki faktorly aýtentıfıkasııany qoldanyńyz: Qaýipsizdikti arttyrý úshin eki faktorly aýtentıfıkasııany mindetti túrde qoldanyńyz.
4. Qupııa derekterdi jarııalamańyz: Bank kartalarynyń derekterin, SMS-tegi bir rettik kodtardy jáne kez kelgen qupııa aqparatty úshinshi tulǵalarǵa eshqashan aıtpańyz.
«Qyraǵy bolyńyzdar, kıberqaýipsizdikti saqtańyzdar», dep qorytyndylady Bas prokýratýrasy.