Memleket basshysynyń Jarlyǵymen Respýblıka kúnine oraı eldiń ekonomıkalyq jáne qoǵamdyq ómiriniń túrli salalaryn damytýǵa eleýli úles qosqan birqatar azamattar marapattaldy. Olardyń keıbiri marapat tabystalar sátte elimizden tys jerde bolǵandyqtan nagradalaryn búgin qolyna aldy, dep jazady Egemen.kz.
Bul týraly óziniń áleýmettik jelidegi paraqshasynda Premer-mınıstrdiń orynbasary – Mádenıet jáne aqparat mınıstri Aıda Balaeva jazdy.
«Qurmet» ordenimen Konfessııaaralyq jáne dinaralyq dıalogtyń halyqaralyq ortalyǵy janyndaǵy Sezdiń bastamalaryn iske asyrý departamentiniń burynǵy basshysy Qarlyǵash Qalılahanova jáne «Gremmı» júldesin alǵan tuńǵysh qazaqstandyq mýzykant Imanbek Zeıkenov marapattaldy. Al akter, kaskadıor jáne kásibı aralas jekpe-jek sheberi Erkebulan Toqtar «Qazaqstannyń eńbek sińirgen qaıratkeri» ataǵyna ıe boldy.
Aıda Balaeva marapat ıelerin quttyqtap, ıgilikti joldaǵy qajyrly eńbekteri úshin alǵys bildirdi.