Jaýapkershilik – adam boıyndaǵy baǵaly qasıetterdiń biri. Al, qyzmet barysyndaǵy jaýapkershilik qyzmettester aldynda abyroıly etip, tabysqa jeteleıdi. Al keıde bul qasıettiń adam ómirin saqtap qalýy da múmkin. «Qazaqstan temir joly» UK» AQ-y Jambyl fılıalynyń qyzmetkeri Aıdos Sultanbekov bul sózimizge dálel bola alady.
Aıdos Jambyl vagon paıdalaný deposynyń Jambyl stansasyndaǵy óndiristik-tehnıkalyq ortalyǵynyń (PTO) vagon qaraýshysy. Sońǵy úsh jyldyń kóleminde atalmysh kásiporynda óz mamandyǵy boıynsha eńbek etip kele jatqan ol kúndelikti vagondardyń júris bóligin tekserýmen aınalysady. Alaıda, shildeniń 24-nen 25-ine qaraǵan túni kezekti tekseristerdiń birinde jas maman qyraǵylyǵynyń arqasynda aýyr apattyń aldyn aldy. Anyǵyn aıtqanda, ol mekemeniń 11-jolyna kelip toqtaǵan júk poıyzynyń vagondaryn tekserý kezinde №28082428 vagonnyń búıir ramasynyń synyǵyn baıqap, der kezinde eskerte bilgen.
Kásiporynǵa Aıdosty izdep barǵanymyzda, aýysymmen jumysqa túsken sáti eken .
– Men jumys istegeli beri mundaı iri kólemde aqaý anyqtaǵan emespin. 11-jolǵa taq poıyzdy habarlap, júk poıyzy kelip toqtady. Bas avtomatshy retinde vagondardy qarap kele jatyp basynan sanaǵanda onynshy vagonnyń búıir ramasyndaǵy synyqty kózim shaldy. Bul jaıynda aǵa nusqaýshyǵa habar berdim. Ile operatorǵa habarlap, vagondy sheship, 41-shi jolǵa qoıdyq. Shyndyǵynda, mundaı jaǵdaıdy baıqamaǵanymyzda, vagonnyń joldan shyǵý qaýpi bar edi. Onyń ústine qatty jyldamdyqta kele jatyp qulaǵan vagon qarsy bettegi jolaýshylar vagondaryna da zaqym keltirer edi. Vagondar Ýkraınada jasalǵan. 2013 jyldan beri qoldanysta júr. Áli depolyq qaraýdan ótpegen. Depolyq qaraý bul vagondarǵa 2016 jylǵa josparlanǵan eken. О́zimniń tańdaǵan mamandyǵym «vagon qaraýshy». Sondyqtan, bolat joldyń boıynda úsh jyl eńbek etsem, aldaǵy eńbek jolymdy osy salamen tyǵyz baılanystyramyn degen oıdamyn. О́z kásibime adal bolǵym keledi. Onyń ústine nusqaýshylarymyzdyń ótkizgen árbir tehnıkalyq sabaqtarynan bilmegenimizdi kóńilge túıip, sheberligimizdi shyńdap kelemiz, – deıdi Aıdos.
Jalpy, Jambyl vagon paıdalaný deposynyń vagon qaraýshylary 2014-2015 jyl aralyǵynda 43 búıir ramasynyń aqaýyn anyqtaǵan eken. Qyraǵy mamandardyń jumys sapasyn arttyrýdaǵy úlesi osyndaı. Sondyqtan, depo basshylyǵy temirjolshylar qaýymynyń tól kásibı merekesinde vagon qaraýshy Aıdos Sultanbaevty «Qozǵalys qaýipsizdigi úshin» tósbelgisine usyndy. Bul qurmetke ábden laıyq Aıdos Astanaǵa baryp, «Qazaqstan temir joly» «UK» AQ prezıdenti Asqar Mamınniń qolynan atalǵan tósbelgini alyp keldi.
Oralhan DÁÝIT,
«Egemen Qazaqstan».
Jambyl oblysy.