Tonaýshylar mýzeı qoımasynan Brıtan ımperııasynyń tarıhyna arnalǵan kolleksııadaǵy áskerı relıkvııalardy, zergerlik áshekeılerdi, qazba qaldyqtaryn jáne pil súıeginen, qola jáne kúmisten jasalǵan músinshelerdi urlap ketken, dep jazady Egemen.kz.
Urlyq 25 qyrkúıekke qaraǵan túni bolǵan. Brıstol qalalyq keńesiniń ókili málimdegendeı, bılik aldyn ala tergeý jumystary aıaqtalǵansha aqparatty jarııalamaýdy jón kórgen. Sonymen qatar arhıv qyzmetkerlerine naqty qandaı zattardyń joǵalǵanyn anyqtaý úshin ýaqyt qajet bolǵan. Mýzeı qoımasynan mádenı jáne materıaldyq turǵydan asa qundy 600-den astam zat urlanǵany týraly BBC-diń Reseıdegi qyzmeti habarlaǵan.
«Bul artefaktiler XVIII ǵasyrdyń sońynan XX ǵasyrdyń sońyna deıingi kezeńde Brıtanııa men buryn Brıtan ımperııasynyń quramyna kirgen elder arasyndaǵy baılanystardy qujattaıtyn kolleksııanyń bir bóligi edi. Kolleksııa kóptegen memleketter úshin mádenı mańyzǵa ıe. Bul artefaktiler Brıtan ımperııasynyń qyzmetine qatysqan ári odan zardap shekken adamdardyń ómirine qatysty baǵa jetpes derekter», dedi Brıstol qalalyq keńesiniń mádenıet jáne kreatıvti ındýstrııalar departamentiniń jetekshisi Fılıp Ýoker.
Polısııa urlyqtan keıingi beınebaqylaý jazbalarynan alynǵan 4 er adamnyń fotosýretterin jarııalap, olardy tanyǵan nemese urlanǵan zattardy onlaın satý alańdarynda baıqap qalǵan barlyq azamattardy habarlasýǵa shaqyrady.
Eske salaıyq, buǵan deıin qazan aıynda Lývr mýzeıi de tonalyp, Napoleon dáýirine qatysty zergerlik buıymdar urlanǵan edi. Fransııada tergeý áli jalǵasyp jatyr.