NARXOZ ýnıversıtetinde «Quqyqtyq memleketti nyǵaıtýdaǵy konstıtýsııalyq reformalar men zańnamalyq jańǵyrtýdyń róli» taqyrybynda halyqaralyq ǵylymı-praktıkalyq konferensııa ótti, dep jazady Egemen.kz.
Halyqaralyq ǵalymdar bas qosqan konferensııada keleli máseler talqyǵa salynyp, konstıtýsııalyq reformalar men zańnamalyq jańǵyrtýlar joǵary deńgeıde taldandy. Konferensııany uıymdastyrýshysy – NARXOZ ýnıversıtetiniń Quqyq jáne memlekettik basqarý mektebi. Atalmysh konferensııany – Quqyq jáne memlekettik basqarý mektebiniń dırektory, zań ǵylymdarynyń doktory, professor Talǵat Sársenbaev júrgizdi.
Konferensııaǵa sheteldik jetekshi ǵalymdar da qatysty. Reseı Federasııasy Úkimeti janyndaǵy Zańnama jáne salystyrmaly quqyqtaný ınstıtýtynyń bas ǵylymı qyzmetkeri, Reseı Federasııasynyń eńbek sińirgen ǵylym qaıratkeri, zań ǵylymdarynyń doktory, professor Oleg Zaısev baıandamasynda konstıtýsııalyq reformalardyń memlekettiń qylmystyq saıasatyna áseri qarastyrylyp, qylmystyq normalardyń preventıvtik sıpatyna basymdyq berý qajettigi atap ótse. qyrǵyz ulttyq ýnıversıtetiniń (J. Balasaǵyn atyndaǵy) zań fakýltetiniń dekany, zań ǵylymdarynyń doktory, professor Kynatbek Smanalıev «Quqyqtyq memleketti nyǵaıtýdyń quraly retindegi konstıtýsııalyq reformalar» taqyrybynda baıandama jasap, Qyrǵyzstandaǵy konstıtýsııalyq reformalardyń nátıjelerine jan-jaqty taldaý júrgizdi.
Konferensııa aıasynda Parlamenttik reformany júrgizý máselelerine erekshe nazar aýdaryldy.
Ál-Farabı atyndaǵy Qazaq ulttyq ýnıversıtetiniń birinshi prorektory, zań ǵylymdarynyń doktory, professor Erkin Dúısenov óziniń baıandamasynda júrgizilip jatqan Parlamenttik reforma aıasynda konstıtýsııalyq normalarǵa ózgerister men tolyqtyrýlar engizý jóninde usynystar aıtyldy.
Al zań ǵylymynyń doktory, professor Alýa Ibraevanyń baıandamasynda quqyqtyq memleket qalyptastyrýdaǵy quqyqtyq bilim men quqyqtyq mádenıettiń róli aıryqsha atalyp ótti. Professor óziniń baıandamasynda quqyqtyq bilim – bul quqyqtyq bilimderdi meńgerý jáne olardy tájirıbede qoldaný daǵdylaryn qalyptastyrý júıesi ekenine toqtaldy.
«Qazaqstanda úzdiksiz quqyqtyq bilim berý júıesi qalyptasqan: mekteptiń 9–11 synyptarynda «Quqyq negizderi» páni oqytylady, joǵary bilim berý júıesinde de quqyqtyq bilim negizderi qarastyrylǵan. Ásirese, kásibı zańgerlerdi daıarlaýǵa aıryqsha kóńil bólinýi tıis. Jaqynda 2025–2030 jyldarǵa arnalǵan qoǵamda «Zań jáne tártip» ıdeologııasyn ilgeriletý tujyrymdamasy qabyldandy. Bul qujatta quqyqtyq mádenıetti damytý máseleleri mańyzdy oryn alady. Parlamenttik reformany iske asyrý qoǵamnyń barlyq salalarynda quqyqtyq aǵartýshylyq jumysty turaqty júrgizýdi talap eted» deıdi Alýa Ibraeva.
Qazaqstan Respýblıkasy Ádilet mınıstrligine qarasty Zańnama jáne quqyqtyq aqparat ınstıtýtynyń dırektory, zań ǵylymdarynyń doktory, professor Indıra Aýbakırova baıandamasynda «Sıfrlyq Qazaqstan» strategııalyq baǵyty aıasynda konstıtýsııalyq qundylyqtardy zerdeleýge arnaldy.
Quqyq jáne memlekettik basqarý mektebiniń professory, zań ǵylymdarynyń kandıdaty Sholpan Malıkova óz baıandamasynda «Konstıtýsııalyq kepildikterdiń jáne zańnamalyq jańǵyrtýdyń otbasylyq-turmystyq zorlyq-zombylyqqa qarsy is-qımyl salasyndaǵy róli» jóninde qozǵady.
Tabıǵı resýrstardy utymdy paıdalanýdyń konstıtýsııalyq kepildikteri NARXOZ ýnıversıtetiniń Quqyq jáne memlekettik basqarý mektebiniń professory, zań ǵylymdarynyń doktory Anor Mýkasheva baıandamasynda qarastyrylyp, qoldanystaǵy zańnamaǵa ǵylymı taldaý jasalyp, usynystar berildi.
Konferensııa ǵylymı qaýymdastyq tarapynan úlken qyzyǵýshylyq týdyrdy.
Konferensııa sońynda sharany uıymdastyrýshy NARXOZ ýnıversıteti Quqyq jáne memlekettik basqarý mektebiniń dırektory, zań ǵylymynyń doktory, professor Talǵat Sársenbaev konferensııaǵa kelýshilerge alǵys bildirdi.