Avstralııanyń Sıdneı qalasyndaǵy Bondı jaǵajaıynda belgisiz bireýler oq atty. Málimetter boıynsha onǵa deıin adam qaza taýyp, birnesheýi jaralanǵan. Jańa Ońtústik Ýels shtatynyń polısııasy eki kúdiktini ustaǵan, arnaıy operasııa jalǵasyp jatyr, dep jazady Egemen.kz.
BAQ derekterine sáıkes, shabýyldaýshylardyń birine oq tıip qaıtys bolǵan, ekinshisi jaralanǵan. Izraıl Prezıdenti Ishak Gersog bul oqıǵany evreı qaýymyna qarsy shabýyl dep ataǵan.
«Bizdiń baýyrlarymyz Bondı jaǵajaıynda Hanýkanyń alǵashqy shamyn jaǵý úshin jınalǵan ýaqytta terrorısterdiń qatygez shabýylyna ushyrady», dep keltirgen onyń sózin Ierýsalımdegi keńsesi.
Aıta keteıik, Hanýka – evreı halqynyń jaryq meıramy, ol grıgorıan kúntizbesi boıynsha qarashanyń sońy men jeltoqsannyń basynda 8 kún boıy atap ótiledi. 2025 jyly Hanýka 14 jeltoqsan keshinde bastalyp, 22 jeltoqsan keshinde aıaqtalady.
Polısııa turǵyndardy bul aýmaqtan aýlaq bolýǵa, al jaǵajaı mańynda júrgenderdi qaýipsiz jerge jasyrynýǵa shaqyrdy.
Keminde birneshe adam jaraqat alǵan. Zardap shekkender týraly naqty málimetter anyqtalyp jatyr.
Taralǵan kýágerlerdiń vıdeosynda oq atqan adamdardyń birin artqy jaǵynan kelgen kezdeısoq ótip bara jatqan adam qarýsyzdandyryp, myltyǵyn tartyp alǵany kórinedi.
Avstralııalyq News.com basylymy Sıdneı jaǵajaıyndaǵy atys saldarynan on adam qaza tapqanyn, olardyń arasynda balalar men bir polısııa qyzmetkeri bar ekenin habarlady. Polısııadaǵy derekkózder shabýyl birneshe aı boıy josparlanǵan bolýy múmkin dep boljaıdy.