Ǵasyrdan asa ýaqyt halqymen birge jasasyp, eldiń qýanyshynda da, qaıǵysynda da tirshilik qazanynda birge qaınaǵan ult únparaǵy – «Egemen Qazaqstan» gazetiniń jaryq kóre bastaǵanyna 106 jyl toldy.
Gazetimizdiń eń alǵashqy nómiri 1919 jyldyń 17 jeltoqsanynda «Ushqyn» degen atpen oqyrmanǵa jetkeni málim. Ol ýaqytta qazaq qoǵamy arab qarpi negizindegi tóte jazýdy qoldanatyn. Tarıhqa «Ahmet Baıtursynulynyń jazýy» bolyp engen qarip keıin jetildirildi. Alǵashqy nómirdiń birinshi betinde Bernııaz Kúleıulynyń «Ushqynǵa» degen taqyryppen quttyqtaý óleńi, «Oqýshylarǵa» (qazirgishe oqyrmandarǵa) jáne «Jalpy qazaq sıezine ázirlenińder» degen eki maqala basylypty.
«Qutty bolsyn,
jas «Ushqynym», qadamyń,
Alǵa bassyn aq nıetti talabyń.
Tileýińde úlken, kishi azamat,
Erkin úshin eńiregen qazaǵyń.
Bul «Ushqynnan» erkin jospar tabarsyń,
En dalaǵa erinbesten bararsyń.
Aýyldy, erikti jerdi sáýlelendirip,
El oshaǵy ortasynda janarsyń.
Altyn Altaı, Edil, Jaıyq, Saryarqa,
Saýyt kıip, sadaq tartqan er bar ma?
Arý azyp, el úrkek bop, jer tozyp,
Jaýǵa jaǵa jyrttyrmaǵan el bar ma?
Alty alashtyń qyzyl týyn qolyńa al,
Ertede erkin ótken kúnin oıyńa al.
Eldi jerden, erdi erikten aıyrǵan,
Dushpanyńdy taban tirep, jolyńa al.
Biz de artyńnan eli qalmaı erermiz.
Oımen aqyl, qolmen qýat berermiz.
Elge erik, jerge kórik ápermeı,
Júrsek birge, ólsek birge ólermiz!»
dep jyrlaıdy birtýar aqyn.
«Ushqyn» gazıtasynyń maqsuty – sharýa halqyna bas-kóz bolý. Túrli habarlar hám kerek isterdi ýaqytymen jazyp, halyqty qulaqtandyrý... Qany bir, tilegi durys jas gazıtin qazaq eli hám júreginde qazaq qany bar azamat jatyrqamas. Qolynan kelgeninshe paıdaly dep bilgenin jazyp turar. El qamy, el tilegi úshin «Ushqynnyń» qoıny ashýly, nıeti durys. Bilgen kisige «Ushqyn» eldiń aq nıetti, adal tilekti bir balasy, qashanda bolsa elin renjitpes, anasynyń aq sútin aqtar» dep jazylǵan «Oqýshylarǵa» atty bas maqalada.
Elimiz azattyq alǵanan keıin 1994 jyly «Egemenniń» 75 jyldyǵyna arnalǵan mereıtoılyq nómirinde «Gazettiń alǵashqy kerýenbasylary» atty maqala jaryq kórgen. Oqyp otyrsaq, basylym ómirge kelgeli ult oqyǵandary men qaıratkerleriniń osy gazette qyzmet istemegeni kemde-kem eken. Alash arystary Smaǵul Sadýaqasuly, Júsipbek Aımaýytuly, Mirjaqyp Dýlatuly bastap, Sáken Seıfýllın, Turar Rysqulov, Muhtar Áýezov, Beıimbet Maılın, Ǵabıt Músirepov, Sherhan Murtaza, Ábish Kekilbaıuly sekildi alyptar basshylyq etken.
Eń alǵashqy nómirde jazylǵandaı, «maqsuty – halqyna bas-kóz bolý» jolynan bizdiń basylym eshýaqytta aınyǵan emes. Azattyq alǵanymyz týraly habardy da alǵash bolyp taratyp, aqsarbas aıtqanyn buǵan deıin jazǵan edik. Al jańa zaman ornaǵan soń, ǵasyrdan astam tarıhy bar bas gazet ınternettiń ıirimine jutylyp ketpeı, ultqa qyzmet jolynan aınymastan, aqparat aıdynyndaǵy jemisti qyzmetin jalǵastyryp keledi. «Halyqtyń kózi, qulaǵy hám tili» deńgeıindegi basylymnyń eldik múdde jolyndaǵy alar asýy bıik bola bergeı!