Keles aýdany aýmaǵyndaǵy uzaq jyldardan beri paıdalanylyp kele jatqan Keles ózeninen ótetin kópir birneshe kún boıy jaýǵan nóser jańbyrdyń saldarynan tirek baǵandarynyń túbi shaıylyp, qulaǵan bolatyn. Eski kópirdiń ornyna jańasyn salý josparlanyp otyr, dep habarlaıdy Egemen.kz.
Kópir 1970 jyldary salynǵan. Uzyndyǵy – 54 metr, eni – 11 metr, bıiktigi – 6,5 metr. Atalǵan kópir arqyly Ushqyn aýyldyq okrýgine qarasty Dostyq, Qoralas jáne Ushqyn eldi mekenderiniń turǵyndary Abaı aýylymen kólik qatynasyn júzege asyrǵan. Ortasha jóndeý jumystary 2010 jyly júrgizilgen, al 2024 jyly «Ońtústik joldary» MKK tarapynan jaǵalaýdy betonmen bekitý jáne ózen túbine iri tas tóseý jumystary atqarylypty.
Oblys ákiminiń birinshi orynbasary Zulpyhar Joldasov jaýapty sala basshylarymen birge kópirdiń qulaýyna baılanysty oqıǵa ornyna baryp, kóshpeli keńes ótkizdi. Kezdesý barysynda jańa kópir salý máseleleri talqylanyp, tıisti uıymdastyrý jumystary bastaldy. Qazirgi ýaqytta jobalaý uıymymen jobalyq-smetalyq qujattamany ázirleý boıynsha kelissózder júrgizilip jatyr.
Avtokólik qozǵalysy ýaqytsha aınalma joldar arqyly uıymdastyrylǵan. Sonymen qatar, kópir arqyly ótken «Darbaza» TSJ-nyń sý qubyry zaqymdanýyna baılanysty Ushqyn eldi mekenindegi 136 úıge táýligine eki ret arnaıy avtosısternalar arqyly sý jetkizilip jatyr. Qalyptasqan jaǵdaıǵa baılanysty Ushqyn eldi mekenindegi 40 oqýshy aǵymdaǵy toqsan aıaqtalǵanǵa deıin qashyqtan oqytý formatyna aýystyrylǵan.