Qańtar aıynda ótetin UBT-ǵa qatysý úshin ótinish qabyldaý 22 jeltoqsan bastalyp, 30 jeltoqsanǵa deıin jalǵasady. UBT-ǵa tirkelý Ulttyq testileý ortalyǵynyń app.testcenter.kz saıtynda nemese UTO qosymshasy arqyly júrgiziledi, dep jazady Egemen.kz.
Al testileýdiń ózi 10 qańtar men 10 aqpan aralyǵynda ótedi.
Ǵylym jáne joǵary bilim mınıstrliginiń málimetinshe, qańtardaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan, jazǵy UBT nátıjeleri boıynsha shekti ball jınamaǵandar, shyǵarmashylyq bilim berý baǵdarlamalarynyń toptarynan aqyly negizde basqa daıyndyq baǵyttaryna, pedagogıkalyq baǵytqa aqyly negizde aýysqysy keletinder, ótken jylǵy mektep jáne kolledj túlekteri, Qazaqstan azamattyǵy joq biraq ulty qazaq tulǵalar, shetelde bilim alǵan Qazaqstan azamattary, sondaı-aq mektep bitiretin túlekter joǵary oqý oryndaryna aqyly negizde túsý úshin qatysady.
О́tinish berý barysynda qatysýshylar testileý ótkiziletin oryndy, kúndi jáne ýaqytty ózderi tańdaıdy.
2026 jyly Ulttyq biryńǵaı testileýdiń formaty ózgermeıdi. UBT qurylymy burynǵy qalpynda qalady: talapkerler úsh mindetti pándi jáne tańdaýy boıynsha eki beıindik pándi tapsyrady. UBT tapsyrmalarynyń jalpy sany – 120. Onyń ishinde «Qazaqstan tarıhy» páni boıynsha – 20 tapsyrma, «Oqý saýattylyǵy» men «Matematıkalyq saýattylyq» pánderinen – 10 tapsyrmadan, sondaı-aq eki beıindik pánniń árqaısysynan – 40 tapsyrmadan beriledi. UBT boıynsha eń joǵary ball da ózgermeıdi.
Aıta keteıik, UBT transformasııasy 2027 jyly bastalady. Bul týraly Májilis kýlýarynda Ǵylym jáne joǵary bilim vıse-mınıstri Gúlzat Kóbenova aıtqan bolatyn.