Kólik mınıstrligi qazaqstandyqtarǵa ne sebepti jolaýshylardyń ushaq bortynda muzdanýǵa qarsy óńdeý aıaqtalǵansha kútýine týra keletini túsindirdi, dep habarlaıdy Egemen.kz.
Azamattyq avıasııa komıtetiniń málimetinshe, áýe kemelerin muzdan tazartý (deaısıng) – ushaqty qaýipsiz ushyrý úshin júrgiziletin daıyndyqtyń asa mańyzdy bóligi.
– Qys mezgilinde muzdaný qaýpi aıtarlyqtaı artady. Qanattarda nemese basqa da mańyzdy betterde paıda bolǵan muzdyń, qyraýdyń nemese qardyń juqa qabatynyń ózi áýe kemesiniń aerodınamıkalyq qasıetterin nasharlatyp, aýa kedergisin arttyryp, kóterý kúshin azaıtady. Bul ushý sıpattamalarynyń tómendeýine alyp keledi, – delingen habarlamada.
Osy sebepti halyqaralyq tájirıbe men ulttyq rásimderde mindetti túrde muzdan tazartý qoldanylady. Ol ádette bir nemese eki kezeńde júrgiziletin arnaıy suıyqtyqty qoldanýdy qamtıdy:
- Áýe kemesiniń mańyzdy betterinen muzdy, qardy, qyraýdy jáne basqa da lastanýlardy alyp tastaý;
- Qaıta muzdanýdyń aldyn alý úshin belgili bir ýaqyt ishinde áser etetin qorǵanys qabatyn jaǵý.
Azamattyq avıasııa komıteti muzdanýǵa qarsy óńdeýdiń ne sebepti jolaýshylar ushaqqa otyrǵannan keıin bastalatynyn da túsindirdi.
– Muzdan tazartý jumystary jolaýshylar tolyq otyrǵyzylyp, áýe kemesiniń barlyq esikteri jabylǵannan keıin júrgiziledi. Bul talaptyń negizgi sebebi – muzdanýǵa qarsy suıyqtyqtardyń áser etý ýaqytynyń shekteýli bolýynda. Qorǵanys qabatynyń tıimdiligin barynsha arttyrý jáne onyń ushyp shyqqanǵa deıin saqtalýyn qamtamasyz etý úshin óńdeý múmkindiginshe ushý ýaqytyna jaqyn jasalýy tıis, – delingen habarlamada.
Jolaýshylar otyrǵyzylyp, esikter jabylǵannan keıin ushaq turaqta qalady nemese arnaıy muzdan aryltý alańyna jetkiziledi. Aýa raıy jaǵdaıyna baılanysty óńdeý birden nemese jaǵdaı jaqsarǵan kezde oryndalady. Komıtet mundaı keshigýlerdiń ushý qaýipsizdigin qamtamasyz etýge baǵyttalǵan sharalardyń mindetti bóligi ekenin atap ótti.