2026 jylǵy 1 qańtardan bastap Qazaqstanda mindetti áleýmettik medısınalyq saqtandyrý (MÁMS) júıesimen jumyssyz ári turaqty tabysy joq azamattar avtomatty túrde qamtylady. Bul týraly Densaýlyq saqtaý mınıstrligi málimdedi, dep habarlaıdy Egemen.kz.
Mınıstrliktiń dereginshe, búginde MÁMS júıesine 16,8 mln adam qatysady. Onyń 12,3 mıllıony – jeńildetilgen sanattaǵy azamattar, olar úshin jarnalardy memleket tóleıdi. Al shamamen 3,6 mln adam áli kúnge deıin saqtandyrý júıesinen tys qalyp otyr.
Kimder saqtandyrylmaı júr?
Saqtandyrýsyz qalǵan azamattar eki topqa bólinedi.
Birinshi top – tabysy jetkilikti bolsa da, túrli sebeptermen MÁMS-ke qatyspaı otyrǵan shamamen 2,5 mln adam.
Ekinshi top – áleýmettik osal sanattaǵy 1,1 mln azamat. Bul – jumyssyz, tabysy tómen, sońǵy aılarda zeınetaqy jarnasyn tólemegen adamdar.
Ne ózgeredi?
Jańa zańnamaǵa sáıkes, áleýmettik ál-aýqattyń daǵdarystyq jáne shuǵyl deńgeıine jatatyn azamattar (jumys istemeıtin, keminde úsh aı boıy mindetti zeınetaqy jarnalaryn tólemegen, otbasynyń negizgi qajettilikterin óteýde qıyndyq kóretin azamattar) úshin MÁMS jarnalaryn jergilikti atqarýshy organdar tóleıtin bolady.
Mańyzdysy – jarna adam medısınalyq kómekke júgingen sátte aýdarylady. Iаǵnı buryn saqtandyrylmaǵan bolsa da, azamat medısınalyq qyzmetti birden ala alady.
Osylaısha, 2026 jyly shamamen 1 mln adam MÁMS júıesine qosymsha túrde qamtylady.
Qandaı shart bar?
MÁMS sheńberinde qyzmet alý úshin azamattyń turǵylyqty jeri boıynsha emhanaǵa tirkelýi mindetti. Emhanaǵa tirkelmegen jaǵdaıda saqtandyrý mártebesi bolsa da, júıe qyzmetterin paıdalaný múmkin emes.
Saqtandyrý mártebesin qalaı tekserýge bolady?
MÁMS-tegi mártebeni:
Áleýmettik medısınalyq saqtandyrý qorynyń resmı saıtynan;
SaqtandyryBot Telegram-boty arqyly;
Damumed, Qoldau 24/7 qosymshalarynda;
keıbir bankterdiń mobıldi qosymshalarynan tekserýge bolady.
Turaqty tóleýshilerge jeńildik
2026 jyldan bastap keminde 5 jyl qatarynan MÁMS jarnasyn tólegen azamattar, tólem ýaqytsha toqtaǵan jaǵdaıda da 6 aı boıy saqtandyrylǵan mártebesin saqtaı alady.
Mınıstrlik bul ózgerister MÁMS júıesin anaǵurlym áleýmettik baǵyttalǵan, ári halyqqa qoljetimdi etetinin atap ótti. Jańa tetik ásirese jumyssyz jáne tabysy tómen azamattardyń medısınalyq kómeksiz qalmaýyna múmkindik beredi.
Memleket basshysy MÁMS týraly Zańǵa shilde aıynda qol qoıǵany málim.
MÁMS júıesin jetildirý baǵytynda mańyzdy zań qabyldandy.