Elimizde ekologııalyq mádenıetti qalyptastyrýǵa baǵyttalǵan «Taza Qazaqstan» tujyrymdamasyn iske asyrý júıeli túrde jalǵasyp jatyr. Bul bastama ýaqytsha naýqan emes, qoǵamnyń oılaý júıesin ózgertýge baǵyttalǵan uzaqmerzimdi saıasat retinde ornyǵyp keledi. Qorshaǵan ortaǵa jaýapkershilikpen qaraý – búginde árbir azamattyń kúndelikti ádetine aınalýǵa tıis mańyzdy qundylyq.
Tujyrymdamany júzege asyrý ortalyq pen jergilikti atqarýshy organdardyń úılesimdi jumysyna negizdelgen. Ekologııalyq daǵdylardy qalyptastyrý, bilim, aǵartý baǵyttaryn qamtıtyn 60 is-sharadan turatyn jospar osy maqsatqa qyzmet etedi. Bul – ekologııa máselesin tek memlekettik deńgeıde emes, qoǵamdyq sana arqyly sheshýge baǵyttalǵan tásil.
«Taza Qazaqstan» aıasynda el kóleminde 1 294 ekologııalyq is-sharanyń ótkizilýi qoǵamda ekologııalyq serpinniń bar ekenin aıqyn kórsetti. Barshany biriktirgen bastama barysynda árbir úshinshi turǵynnyń boı kórsetýi – azamattardyń beıjaı emestigin bildiretin mańyzdy kórsetkish. Bul – durys baǵytta kele jatqanymyzdyń dáleli.
Ekologııalyq aksııalarǵa 6,4 mln-nan astam adamnyń qatysýy, onyń ishinde 781 myńnan astam eriktiniń bolýy qoǵamdyq jaýapkershiliktiń jańa deńgeıge kóterilgenin ańǵartady. Mundaı belsendilik ekologııalyq mádenıet birtindep qalyptasyp kele jatqanyn kórsetedi.
844 myń tonnadan astam qaldyqtyń jınalýy, 1,1 mln ga aýmaqtyń tazartylýy – atqarylǵan jumystyń naqty nátıjesi. Bul derekter ekologııa salasyndaǵy bastamalardyń sóz júzinde emes, is júzinde júzege asyp jatqanyn dáleldeıdi.
Ruqsat etilmegen qoqys oryndaryn joıý baǵytynda qabyldanyp jatqan sharalar da nazar aýdararlyq. 1 300-den astam mobıldi toptyń 100 myńnan asa reıd júrgizýi – ekologııa salasyndaǵy tártiptiń kúsheıgenin kórsetedi. Ǵaryshtyq monıtorıng arqyly zańsyz qoqys oryndarynyń 25%-ǵa azaıýy baqylaý men talaptyń nátıjesi bar ekenin ańǵartady.
Bul rette tazalyq tek baqylaýmen ǵana emes, sana arqyly ornyǵýǵa tıis ekeni anyq. Qoǵamda «Tazalyq – bireýdiń mindeti emes, bárimizdiń ortaq jaýapkershiligimiz», degen túsinik qalyptasqanda ǵana bul másele túbegeıli sheshiledi.
@TazaQazBot chat-botynyń iske qosylýy men eGov arqyly mıllıondaǵan azamatty qamtyǵan habarlamalar halyqpen keri baılanystyń jańa deńgeıin qalyptastyrdy. 24 myńnan astam ótinishtiń túsýi, olardyń basym bóliginiń oryndalýy – sıfrlyq quraldardyń tıimdiligine aıqyn dálel. Bul memlekettik organdardyń halyqqa jaqyndaı túskenin, azamattardyń óz aýlasy men kóshesine beıjaı qaramaıtynyn bildiredi.
Bıyl 335,6 mln aǵash otyrǵyzyldy, bul – ekologııalyq tepe-teńdikti saqtaýǵa baǵyttalǵan aýqymdy jumys. Bul – tek statıstıkalyq kórsetkish emes, bolashaq urpaqqa qaldyrylatyn naqty ekologııalyq kapıtal.
Qaldyqtardy basqarý salasyndaǵy jobalar, suryptaý men qaıta óńdeýdi damytý, qoqys jaǵý zaýyttaryn salý ekologııa máselesine keshendi kózqarastyń qalyptasqanyn kórsetedi. Bul baǵyttaǵy ınvestısııalar elimizdiń ekologııalyq qaýipsizdigine salynǵan uzaqmerzimdi ınvestısııa deýge tolyq negiz bar.
«Taza Qazaqstan» – ekologııa týraly ǵana emes, tártip, mádenıet, jaýapkershilik týraly tujyrymdama. Tabıǵatty aıalaý, qorshaǵan ortany qorǵaý, tazalyqty saqtaý ýaqytsha naýqan emes, ulttyń ómir saltyna aınalýǵa tıis qundylyqtar. Ortaq úıimiz – elimizdiń tazalyǵy ár azamattyń kúndelikti isinen bastalady. Memleket pen qoǵamnyń birlesken áreketi ekologııalyq mádenıeti joǵary el qalyptastyrýdyń berik negizi bolady.
Taza Qazaqstan – taza bolashaq. Sol bolashaqty qalyptastyrýǵa úles qosý – árqaısymyzdyń azamattyq paryzymyz. Kósheniń tazalyǵynan bastap, aýlanyń tártibine deıingi árbir is ortaq úıimizdiń kelbetin aıqyndaıdy. Memleket pen qoǵamnyń birlesken qadamy ǵana ekologııalyq mádenıeti joǵary, jaýapkershiligi berik el qalyptastyra alady. Búgingi áreket – erteńgi urpaqqa qalatyn mura. Osy turǵyda «Taza Qazaqstan» ár azamatty beıjaı qaldyrmaıtyn, eldik sanany nyǵaıtatyn mańyzdy bastama.
Erlan NYSANBAEV,
Ekologııa jáne tabıǵı resýrstar mınıstri