Búgin Úkimet basshysy Oljas Bektenov quqyq buzýshylyqtyń aldyn alý jónindegi vedomstvoaralyq komıssııa otyrysyn ótkizdi. Jıynda mereke kúnderindegi qaýipsizdik sharalary pysyqtaldy, dep jazady Egemen.kz.
Jańajyldyq mereke kúnderi elimizde qoǵamdyq tártipti qorǵaý jáne órt qaýipsizdigin baqylaý kúsheıtilip, rezervtik kúshter ázirlenedi. Ishki ister mınıstriniń orynbasary Igor Lepeha kóshelerdegi polısııa patrýlderi kóbeıip, strategııalyq nysandar men azamattar kóp jınalatyn oryndarda táýlik boıy kezekshilik uıymdastyrylatynyn aıtty.
Mereke qarsańynda óńirlerde myńnan astam buqaralyq is-shara josparlanǵan. Olardyń basym bóligi balalardyń qatysýymen ótedi. Osyǵan baılanysty Premer-mınıstr Ishki ister mınıstrligine Tótenshe jaǵdaılar mınıstrligimen birlese otyryp, josparlanǵan is-sharalardyń qaýipsiz ótýin qamtamasyz etý úshin qajetti sharalardy qabyldaýdy jáne táýlik boıy patrýldik, kezekshi quramnyń jumysyn uıymdastyrýdy tapsyrdy.
«Bizdiń mindetimiz is-sharalar ótetin jerlerde quqyq buzýshylyqtar men qylmystardyń aldyn alý jumystaryn qamtamasyz etý. Kósheler men qoǵamdyq oryndarda qylmystardyń profılaktıkasynyń tıimdi júıesin qurǵan jón. Jaǵdaıdy baqylaýǵa alyp, onyń ishinde beınekameralar arqyly vızýaldy baqylaý uıymdastyrý qajet. Qajet bolǵan jaǵdaıda oqıǵalarǵa shuǵyl áreket etý sharalaryn qamtamasyz etińizder. Sondaı-aq adamdar kóp jınalatyn nysandarda lańkestik shabýyldardyń aldyn alý úshin keshendi profılaktıkalyq sharalar qabyldansyn. IIM men TJM-ǵa kúsheıtilgen rejımde jumys isteý tártibine kóshýdi tapsyramyn», dep tapsyrdy Premer-mınıstr.
Mereke kúnderi órt qaýipsizdigin qamtamasyz etý máselesine de kóńil aýdaryldy. Is-sharalardyń basym bóligi adamdar kóp jınalatyn nysandarda, sondaı-aq oıyn-saýyq jáne qoǵamdyq oryndarda ótedi. Sharalarda pırotehnıkalyq ónimder de qoldanylady. Búginde aınalymnan 700 birlikten astam jáne 97 qorap sertıfıkaty joq pırotehnıka alynǵan. Mereke qarsańynda taǵy bir ret «Quqyqtyq tártip» profılaktıkalyq is-sharalaryn ótkizý tapsyrylyp otyr. Onyń aıasynda pırotehnıkalyq ónimderdi saqtaý jáne satý oryndaryna reıdter uıymdastyrylady.
TJM mamandary adamdar kóp jınalatyn 7 myńnan astam nysandy teksergen. Sondaı-aq merekelik is-sharalar ótkiziletin oryndar tekserilip, paıdalanýǵa ruqsat berilgen.
Halyqtyń áleýmettik osal sanatyndaǵy azamattar turatyn turǵyn úılerde órtke qarsy datchıkterdi montajdaý jumystary jalǵasyp jatyr. Qazirgi ýaqytta turǵyn úılerde 36 myńnan astam qorǵanys qurylǵylary ornatylǵan.
Mereke kúnderi qala ishinde de, shyǵaberis joldarynda da avtomobıl trafıgi artatyny da sózsiz. Sondyqtan avtomobıl joldarynda erekshe baqylaý ornatylǵan. Mamandar aýa raıy nasharlaǵan jaǵdaıda qutqarý jumystaryn pysyqtady. Al avtojoldarda jylytý oryndary jabdyqtalǵan, arnaıy tehnıka men avıasııa jedel den qoıý rejımine aýystyrylǵan.
О́ńirlerde balalardy tasymaldaýda mindetti túrde polısııa qyzmetkerleri birge erip júrýge tıis. Ákimderge bul máseleni erekshe baqylaýǵa alý tapsyryldy.
«О́ńir ákimdikterine aldaǵy merekelerdi qaýipsiz ótkizý boıynsha keshendi profılaktıkalyq sharalardy qabyldaýdy tapsyramyn. Energetıka mınıstrligi ákimdiktermen birlesip, energetıkalyq obektilerde qaýipsizdikti jáne olardyń aqaýsyz jumys isteýin qamtamasyz etsin. Jylytý jáne sýmen jabdyqtaý júıeleriniń barlyq parametrlerin saqtap, jedel áreket etý úshin jóndeý brıgadalarynyń kezekshilik kestesin jasaý qajet. Jalpy alǵanda barlyq memlekettik organ men qurylym mereke kúnderin sátti jáne tynysh ótkizý úshin jan-jaqty sharalar qabyldaýy kerek», dedi Oljas Bektenov.