Prezıdent Qasym-Jomart Toqaev Jambyl oblysyna jumys saparymen keldi. Prezıdent birqatar ónerkásiptik jáne áleýmettik nysandardy aralap, ekonomıkanyń túrli sektoryndaǵy ınvestısııalyq jobalardyń júzege asyrylý barysymen tanysty, sondaı-aq oblys jurtshylyǵymen kezdesti.
Otandyq farmasevtıkany ilgeriletken
Qasym-Jomart Toqaevtyń bul sapary «Ámir jáne D» jaýapkershiligi shekteýli seriktestiginiń qyzmetimen tanysýdan bastaldy. Kásiporyn medısınalyq buıymdar men dárilik zattar óndiredi. Prezıdentke medısınalyq preparattar men daıyn ónim túrlerin shyǵaratyn negizgi sehtyń jumysy kórsetildi.
«Ámir jáne D» JShS áleýmettik mańyzy bar aýrýlardy dıagnostıkalaýǵa arnalǵan jedel testilerdiń kóptegen túrin shyǵarady. Bul ónimder V jáne S gepatıtin, VICh-ınfeksııasyn, mıokard talmasyn, sondaı-aq esirtki jáne psıhotropty zattardy anyqtaı alady. Kásiporynǵa tıesili medısınalyq buıymdardyń 200-den asa ataýly túri bar. Búginde seriktestikte 94 qyzmetker eńbek etedi.
Memleket basshysyna «Super-pharm» farmasevtıkalyq kompanııasynyń jumysy týraly aqparat berildi. Bul – elimizde medısınalyq buıymdar óndiretin jetekshi kásiporyndardyń biri. Zaýytta 600-den asa eńbekker jumys isteıdi. Kompanııa otandyq naryqtaǵy bir rettik qoldanýǵa arnalǵan medısınalyq buıymdarǵa suranystyń 30 paıyzyn qamtamasyz etedi. Atap aıtqanda, kásiporyn túrli operasııalar úshin hırýrgııalyq jáne prosedýralyq jıyntyqtardy, medısınalyq betperdeniń barlyq túrin, birrettik qorǵanysh kıimin, sanıtarlyq-gıgıenalyq maqsattaǵy buıymdardy óndiredi. Sonymen qatar medısınalyq shprıster, ınfýzıondy jáne qandy qaıta quıýǵa arnalǵan sıstema quraldary, basqa da ónimder daıyndalady.
Prezıdent otandyq farmasevtıka ındýstrııasynyń damýy ımportqa táýeldilikti tómendetip, ulttyq densaýlyq saqtaý júıesin nyǵaıtýda mańyzdy ekenin atap ótti.
Indýstrııalyq aımaqtyń ilkimdi isteri
Budan soń Memleket basshysy «Taraz» shaǵyn ındýstrııalyq aımaǵyn aralap kórdi. Aldymen Prezıdentke Jambyl oblysyna ınvestısııa tartý jáne agroónerkásip keshenin damytý jobalary tanystyryldy.
Qasym-Jomart Toqaevqa ekonomıkany ındýstrııalandyrý, mal sharýashylyǵy men aýyl sharýashylyǵy ónimderin óńdeý, egis alqaptaryn ártaraptandyrý, sý únemdeý tehnologııasyn engizý baǵytynda atqarylyp jatqan jumystar týraly baıandalyp, ınvestısııalyq pýl týraly málimet berildi.
Jyl basynan beri óńirge 599,2 mlrd teńge ınvestısııa tartylǵan, ósim 33 paıyzdy quraǵan. Keıingi eki jylda oblysta jalpy quny 242 mlrd teńge bolatyn 56 ınvestısııalyq joba iske asyrylǵan.
Memleket basshysyna oblystaǵy jetekshi kásiporyndardyń jobalary kórsetildi. Olardyń qatarynda «Qazfosfat» seriktestiginiń mıneraldy tyńaıtqyshtar óndirý jáne YONGGANG CENTRAL IRON and STEEL kompanııasy salyp jatqan metallýrgııa zaýyty jobalary bar.
Sondaı-aq Jańatas qalasyndaǵy «EvroHım-Qarataý» aýqymdy ınvestısııalyq jobasynyń aralyq qorytyndysy usynyldy. Qazir kúkirt qyshqylyn óndiretin jańa zaýytty iske qosý aldyndaǵy tekserý jumystary júrgizilip jatyr. Alǵashqy ónim ishki naryqqa jóneltildi.
Aldaǵy ýaqytta paıdalanýǵa beriletin Shengtai Biotech Co.Ltd júgeri óńdeý zaýyty jóninde de baıandaldy. Shý aýdanyndaǵy bul jobaǵa 1,5 mlrd dollar ınvestısııa salynǵan. Sonymen qatar Baızaq aýdanyndaǵy Zhongkai Kazakhstan International Company qant zaýyty qurylysy jaıynda málimet berildi.
Buǵan qosa KAZ FMWORLD AGRICULTURAL MACHINERY kompanııasynyń ındýstrııalyq aımaqta shyǵarylatyn aýylsharýashylyq tehnıkalary kórsetildi.
Sonymen qatar Prezıdent Dala Glass áınek óndiretin kásiporyn qyzmetimen tanysty. Zaýyt bıyl jazda iske qosylǵan. Jobaǵa salynǵan ınvestısııa 1 mlrd teńgeni quraıdy. Jylyna 500 myń sharshy metr áınek shyǵarý josparlanyp otyr. Búginde atalǵan nysanda 50 adam jumys isteıdi. Qasym-Jomart Toqaev kásiporyn qyzmetkerlerimen áńgimelesip, olardyń eńbegine tabys tiledi.
Prezıdent tarıhı portret pen avtobýs syılady
Osy kúni Memleket basshysy Tarazdaǵy mamandandyrylǵan áskerı mektep-ınternatqa bardy. Qasym-Jomart Toqaev oqý kabınetteri men sport zalyn aralap kórdi. Prezıdentke mekemede 180 bala bilim alyp, ınternatta turatyny jóninde baıandaldy.
Mektep jas óskinderge bilim berip, tegin tamaqtandyrady ári turǵynjaımen qamtamasyz etedi. Oqý baǵdarlamasy 7–11 synyptarǵa arnalǵan. Bilim oshaǵynyń negizgi maqsaty – keleshektegi Otan qorǵaýshylardy daıarlaý, olarǵa áskerı-patrıottyq tárbıe berý. Áskerı ınternatta kýrsanttar sabaqtan tys ýaqytta robottehnıka, drondy basqarý, jasandy ıntellekt úıirmelerine qatysady. Bolashaq áskerı qyzmetshilerge aǵylshyn tili tereńdetip oqytylady.
Qasym-Jomart Toqaev oqýshylarmen áńgimelesip, memleket tarapynan áskerı bilim berý júıesin damytýǵa erekshe nazar aýdarylyp otyrǵanyn atap ótti.
Is-shara sońynda Memleket basshysy bilim oshaǵyna Baýyrjan Momyshulynyń portretin jáne elimizde qurastyrylǵan mektep avtobýsyn syıǵa tartty.
Sonymen qatar Qasym-Jomart Toqaev Tarazdaǵy arıtmologııa klınıkasynyń jumysymen tanysty. Bul – júrek soǵysynyń buzylýyn jedel emdeýge mamandanǵan medısınalyq mekeme.
Prezıdentke klınıkanyń kardıologııalyq jáne kardıohırýrgııalyq kómek, sonyń ishinde joǵary tehnologııalyq aralasý arqyly dárigerlik járdemniń tolyq spektrin kórsete alatyny jóninde baıandaldy.
О́ńirdegi biregeı ortalyq júrekti radıojıilik pen krıoablasııa tásilderimen emdeıdi. Mekeme bir aýysymda 150 adamǵa deıin qabyldaı alady. Sondaı-aq 47 oryndyq stasıonar bar. Ortalyqqa quıylǵan jalpy ınvestısııa kólemi 2,5 mlrd teńgeni qurady.