2025-2027 jyldary Batys Qazaqstan oblysynda 86 mektepti kúrdeli jóndeý josparlanǵan bolatyn. Bıyl sonyń altaýy jóndeldi. Jaqynda Qaztalov aýdanyndaǵy Qaraózen mektep-lıseıi ǵımaraty jóndelip, paıdalanýǵa berildi, dep habarlaıdy Egemen.kz.
Aýyl mektebin qaladaǵy bilim ordalarynan kem qylmaý, eldegi úsh aýysymdy jáne apatty mektepterdiń sanyn azaıtý – Memleket basshysy Qasym-Jomart Kemeluly Toqaevtyń ózi qadaǵalap otyrǵan mindettiń biri. Bul tapsyrmanyń júıeli júzege asyrylýy «AMANAT» partııasynyń saılaýaldy baǵdarlamasyna da kirgen bolatyn. Qaztalov aýdanyndaǵy belgili Qaraózen mektep-lıseıi janyndaǵy ınternat úıimen birge kúrdeli jóndeýden ótip, jańa jyl qarsańynda qaıta paıdalanýǵa berildi.
Aýdan ákimi Aslanbek Sarqulovtyń aıtýynsha, Qaztalov aýdanynda sońǵy 4 jylda 4 mektep kúrdeli jóndeýden ótse, 5 jańa mektep paıdalanýǵa berilgen. Bul jumystar óńirde bilim sapasynyń artýyna da oń yqpalyn tıgizeri sózsiz.
Qaraózen mektep-lıseıi ǵımaraty 1978 jyly salynǵan bolatyn. Jóndeý nátıjesinde mekteptiń materıaldyq-tehnıkalyq bazasy nyǵaıyp, zamanaýı keıipke endi. Qazir 350 orynǵa eseptelgen mektepte 228 oqýshy bilim alady. 14 bala mektepaldy daıarlyq synybyna barady. Mektepte 44 pedagog sabaq beredi.
- Memleket basshysynyń bastamasymen jáne óńir basshylyǵynyń qoldaýymen mektebimiz kúrdeli jóndeýden ótti. Bilim oshaǵynyń zamanaýı talapqa saı bolǵanyna biz, aýyl turǵyndary, qatty qýanyshtymyz, - deıdi Qaraózen aýylynyń aqsaqaly Bolat Bekeshov.
Batys Qazaqstan oblysy