2025 jyl elordalyq «Astana Balet» teatry úshin shyǵarmashylyq serpilisterge, aýqymdy jobalar men jarqyn jeńisterge toly aıryqsha kezeń retinde tarıhta qaldy. Ujym ulttyq jáne álemdik horeografııa ónerin ushtastyra otyryp, kórermenge mazmuny tereń, kórkemdik deńgeıi joǵary qoıylymdar usynyp, kásibı sheberliktiń bıik úlgisin kórsetti, dep habarlaıdy Egemen.kz.
Jyl kóleminde teatr sahnasynda bes iri premera usynyldy. Solardyń úsheýi – qazaqtyń baı mádenı murasyn, dástúrli qımyl-órnek pen zamanaýı plastıkany úılestirgen ulttyq horeografııalyq mınıatıýralar. Barlyǵy 83 spektakl qoıylyp, 50 myńǵa jýyq kórermen «Astana Balet» ónerin tamashalady. Bul kórsetkish teatrdyń el mádenı keńistigindegi ornynyń aıqyn dáleli.
Teatr ujymy shyǵarmashylyq maýsym barysynda el óńirlerin aralap, Pavlodar, Almaty jáne Qostanaı qalalarynda gastroldik saparlar ótkizdi. Aımaq kórermenderi ár qoıylymdy erekshe yqylaspen qabyldap, ártisterdiń joǵary kásibı deńgeıine, sahnalyq mádenıetine zor baǵa berdi. Gastroldik saparlar ulttyq balet óneriniń keń aýdıtorııaǵa jol tartýyna múmkindik berdi.
2025 jyldyń eń iri ári aıtýly premerasy – Karl Orftyń «Carmina Burana» balet-kantatasy boldy. Bul qoıylym teatr tarıhyndaǵy jańa beleske aınaldy. Alǵash ret bir sahnada hor, sımfonııalyq orkestr, vokaldyq solıster men balet trýppasy birtutas kórkem dúnıe retinde óner kórsetti. Mýzyka men qımyldyń, dramatýrgııa men sahnalyq sheshimniń úılesimi kórermenge umytylmas áser syılady. Atalǵan spektakl XIII teatr maýsymyn saltanatty túrde jaýyp, jyl qorytyndysynda kásibı orta tarapynan «Jyl baleti» ataǵyna ıe boldy.
Halyqaralyq arenadaǵy jetistikter teatrdyń bedelin odan ári nyǵaıtty. «Astana Balet» ujymy Ońtústik Koreıada ótken «Cheonan World Dance Festival 2025» Dúnıejúzilik bı festıvalinde kúmis medal jeńip aldy. Festıval sahnasynda kórermenniń zor yqylasyna bólengen «Uly Dala murasy» konserttik baǵdarlamasy usynylyp, ulttyq horeografııalyq mınıatıýralar arqyly qazaq halqynyń baı rýhanı álemi, tarıhy men estetıkasy pash etildi. Bul jetistik ulttyq horeografııa mektebiniń álemdik deńgeıde básekege qabiletti ekenin taǵy bir márte dáleldedi.
Teatr repertýary bıyl eki aktili «Qos kilem» baletimen tolyqty. Qoıylymda dástúr men zamanaýı kózqaras sabaqtastyǵy kórinis taýyp, kórkemdik izdenistiń jańa baǵyty usynyldy. Sonymen qatar, memlekettik merekelerge arnalǵan «Máńgi el» konserttik baǵdarlamasy aıasynda jańa horeografııalyq mınıatıýralar sahnalanyp, ulttyq ıdeıa men rýhanı birlik taqyryby tereń ashyldy.
2025 jyl teatr ujymy úshin kásibı turǵydan da aıryqsha mańyzǵa ıe boldy. Birqatar ártister el mádenıetiniń damýyna qosqan úlesi úshin «Eren eńbegi úshin» memlekettik nagradasymen marapattaldy. Al teatrdyń bas baletmeısteri men jetekshi solısi álemdik balet ónerindegi eń bedeldi marapattardyń biri sanalatyn «Benois de la Danse 2025» halyqaralyq syılyǵynyń nomınanttary atanyp, ujymnyń shyǵarmashylyq áleýetin halyqaralyq deńgeıde tanytty.
О́nerge adaldyq pen bıik talǵamdy tý etken «Astana Balet» teatry aldaǵy ýaqytta da ulttyq mádenıetti jańasha qyrynan tanytyp, álemdik sahnalarda el óneriniń abyroıyn asqaqtata bermek.