Áleýmettik jelilerde Orynbor qazaqtarynyń eski arhıvtik fotosýretteriniń neırojeli kómegimen óńdelgen beınejazbasy tarady, dep habarlaıdy Egemen.kz.
Beınerolıkte Orynbor óńirinde ómir súrgen qazaqtardyń turmys-tirshiligi men syrtqy kelbetin beıneleıtin arhıvtik fotosýretter paıdalanylǵan. Materıaldar e-history.kz saıtynan alynǵan.
Vıdeo avtorynyń aıtýynsha, bul jumys shamamen bir jyl buryn neırojelilerdiń múmkindigi shekteýli kezeńde jasalǵan. Qazirgi tańda rolık vızýaldy eksperıment retinde ári óńir tarıhyn eske salý maqsatynda qaıta jarııalanyp otyr.
Aıta keteıik, Orynbor qazaqtary – Orynbor oblysyndaǵy eń iri ulttyq qaýymdardyń biri.
Tarıhı turǵydan alǵanda, bul aýmaqtar qazaq dalasymen tyǵyz baılanysty boldy. XVII-XVIII ǵasyrlarda óńir qazaq rýlary, jońǵarlar jáne Sın ımperııasy arasyndaǵy turaqty qaqtyǵystar aımaǵyna aınaldy. XVIII ǵasyrdyń ortasynda qazaq taıpalarynyń bir bóligi Reseıge ant berip, osydan keıin 1735 jyly Jaıyq ózeniniń boıynda Orynbor qalasy áskerı bekinis ári ákimshilik ortalyq retinde negizi qalandy.
Keıinnen qalanyń aınalasynda qorǵanys shepteri men shaǵyn bekinister paıda boldy. Solardyń biri – Ilesk qorǵanysy, onyń ornynda keıin Sol-Ilesk qalasy boı kóterdi.
Keńes dáýirinde de Orynbor qazaq memlekettiliginiń tarıhynda mańyzdy ról atqardy. Azamat soǵysynan keıin Qyrǵyz (Qazaq) avtonomııalyq keńestik sosıalıstik respýblıkasy qurylyp, 1920-1925 jyldary onyń astanasy Orynbor qalasy boldy.
Qazirgi tańda qazaqtar Orynbor oblysy halqynyń shamamen 6 paıyzyn quraıdy jáne sany jaǵynan úshinshi iri etnostyq top sanalady.