Kúntizbe paraǵy aýysqanda árkim jańa jyldy óz tanymymen qarsy alady. Biri jaqyndaryna habarlasyp alǵys aıtady, biri balalyq shaqtaǵy sáýleli sátterin eske alady, endi biri ótkenge oı júgirtip, bolashaqqa jospar qurady. Al bilim men ǵylym salasynyń ókilderi úshin jyl aýysýynyń máni qandaı, jańa jyl qarsańynda olar kimge tilek aıtyp, jastarǵa qandaı baǵyt-baǵdar usynady? Mereke kezinde rektor, ýnıversıtet dekany, ǵylymı keńesshi jáne bilim salasyndaǵy kásipkerdiń jańa jyl týraly oı-tolǵamy men aqjarma tilegin usynyp otyrmyz.
Laýra Qarabasova,
Q.Jubanov atyndaǵy Aqtóbe óńirlik ýnıversıtetiniń rektory:
– 31 jeltoqsan kúni kásibı jolymda tálimger bolǵan, ustazdyq etken jandarǵa mindetti túrde habarlasyp, rızashylyǵymdy bildiremin. Sondaı-aq kúndelikti qarbalasta jıi habarlasa bermeıtin, biraq ómirimde orny bólek adamdarǵa jyly lebiz aıtý mańyzdy dep sanaımyn. Dostarymdy da quttyqtaımyn. Sońǵy jyldary qońyraýdan góri habarlama jazýdy jón kóremin.
Men – bilim salasynyń ókilimin. Búgingi tańda salaǵa sapaly zertteýshiler asa qajet. Eldegi ózgerister men bilim salasyndaǵy sheshimderge zertteý arqyly úlken úles qosýǵa bolady. Jas mamandarǵa úzdiksiz izdenýdi toqtatpaýǵa, kásibı jaýapkershilikti arttyrýǵa jáne ózgeristerge beıim bolýǵa keńes berer edim. Ár salany ústirt meńgergennen góri, bir baǵytty tereń ıgerý mańyzdy. Qazirgi zamanda bilimmen qatar adamgershilik ustanym, ashyq oılaý jáne komandalyq jumys ta úlken ról atqarady.
Serikzat Dúısenǵazy,
L.N.Gýmılev atyndaǵy Eýrazııa ulttyq ýnıversıteti fılologııa fakýltetiniń dekany:
– Bala kúnimizde mektep sport zalynda ótetin jańa jyl keshi qyzyq bolatyn. Aıaz ataǵa shynymen senetinbiz. Esimde erekshe qalǵan sát – bastaýyshta bizge Aıaz ata bolǵan kisiniń, konsert aıaqtalǵan soń kóz aldymda saqal-murtyn sypyryp, kostıýmin sheship tastaǵany. Sóıtsek, Aıaz ata dep júrgenimiz – mekteptegi Maqsat degen jigit eken. Keıin ózimniń de tómengi synyp oqýshylaryna arnalǵan jańa jyldyq keshterge Aıaz ata keıpinde kirip, balalarǵa kámpıt taratyp shyqqanym bar.
Qazir jańa jyldy kúntizbedegi jyl aýysýy retinde qabyldaımyz. Jyldyń jańarýy – búkil álemge ortaq qubylys. Ádette balalardy qalaǵa alyp shyǵyp, bezendirilgen kóshelerdi, túrli-tústi shamdardy kórsetip, serýendep qaıtamyz.
Araı Ilııasova-Shenfeld,
PhD, Nazarbaev ýnıversıteti, NAC, ǵylymı keńesshi:
– Jańa jylda jańa daǵdyny ıgerý mańyzdy. О́z salamdaǵy jastarǵa aıtar keńesim, eshqashan izdenýden jalyqpańdar. Qazirgi jasandy ıntellekt (AI) damyǵan zamanda toqtap qalýǵa bolmaıdy. Únemi bilimdi jetildirip, biliktilikti arttyryp otyrý qajet. Tek qana úzdiksiz oqý men jańa tehnologııalardy meńgerý arqyly ǵana bıik belesterdi baǵyndyrýǵa bolady.
Jańa jylǵa qatysty bala kezdegi myna bir oqıǵa oıǵa oralyp tur. Almatyda turǵan kezimiz. Men Aıaz ataǵa óte uzaq sendim. Bir jyly: «Osy joly uıyqtamaı, shyrshanyń janynda otyryp, Aıaz atany mindetti túrde kóremin», dep óz-ózime ýáde berdim. Tań atqansha kútip otyrdym, biraq bir ýaqytta syrtqa shyǵyp kelsem – shyrshanyń astynda syılyq tur. Men joq bolǵan sanaýly mınýtta Aıaz ata kelip ketkenine qatty renjigenim esimde. Qazir túsinsem, bul ata-anamyzdyń bizge syılaǵan ǵajaıyp ertegisi eken. Balalardyń ertegige senip, ǵajaıyptardy kútip uzaq ómir súrgenin qalaımyn.
Yrysbek Máýit,
«ZERDELI» aqyl-oı damytý ortalyqtary men mektepter jelisiniń negizin qalaýshy:
– Biz bul ýaqytty óz-ózimizge esep berip, oı tarazylaýǵa arnaımyz. Otbasymyzben birge ótken jyldy qorytyndylap, aldaǵy jylǵa maqsat-mindetimizdi aıqyndaımyz. Qysqasy, biz úshin jańa jyl – jarq-jurq etken dýmannan góri, tynyshtyq pen tártipke, oı men josparǵa negizdelgen, kúndelikti tirshiliktiń tabıǵı jalǵasy. Qazirgi jastardyń kóbi birden, tez nátıjege jetýdi qalaıdy. Alaıda men árdaıym jyldam tabysqa emes, tereń bilimge, turaqty ári tabandy eńbekke bet burý kerek ekenin aıtamyn. Bir sáttik shabytpen jasalǵan qarqyndy áreket uzaqqa barmaıdy. Búgin qyzý kirisip, erteń toqtap qalý – nátıje bermeıtin jol. Al turaqtylyq pen júıeli eńbek qana shynaıy jetistikke jetkizedi. Bir kezdesýde oqýshylar maǵan: «Eń jaqsy kóretin formýlańyz qaısy?» dep surady. Sol kezde men «S = V × T» formýlasyn atadym. Iаǵnı araqashyqtyq – jyldamdyq pen ýaqyttyń kóbeıtindisi. Bul – fızıkadaǵy formýla ǵana emes, ómirdegi jetistikke jetýdiń de úlgisi. Adamnyń jasy qanshalyqty jas bolsa, soǵan saı ýaqyty da kóp bolady, demek múmkindigi de mol. Mundaǵy jyldamdyq – bul eńbek ónimdiligi. Al ónimdilik degenimiz bir kúndik qarqyn emes, úzdiksiz ári nátıjeli jumys. Sondyqtan osy formýla – men úshin tek ǵylymdaǵy emes, ómirlik qaǵıdatqa aınalǵan tujyrym.