Qyrǵyzstannyń aıyrbastaý oryndarynda iri kólemde valıýta aýystyrǵysy keletin azamattardan qarajattyń qaıdan alynǵanyn rastaý talap etilýi múmkin. Bul ereje Qyrǵyzstan azamattarymen qatar sol elde júrgen Qazaqstan azamattaryna da qatysty, dep habarlaıdy Egemen.kz.
Qyrǵyzstan Ulttyq banki kiristerdi zańdastyrýǵa (jylystatýǵa) jáne qarjylyq qylmystarǵa qarsy kúres aıasynda aıyrbastaý bıýrolarynyń jumysyna qatysty jańa erejelerdi bekitti.
Jańa talaptarǵa sáıkes, aıyrbastaý oryndary iri nemese kúmándi operasııalar kezinde klıentterdiń qujattaryn ǵana emes, sonymen qatar aqshanyń shyǵý tórkinin tekserýge quqyly. Bul sheshim qarjylyq aınalymnyń ashyqtyǵyn qamtamasyz etý maqsatynda qabyldanǵan.
Aıyrbastaý bıýrolaryna qandaı mindettemeler júkteledi:
Klıentterdi sáıkestendirý: Sheteldikter men jergilikti azamattardyń jeke basyn kýálandyratyn qujattardy muqııat tekserý; Derekkózdi naqtylaý: Qajet bolǵan jaǵdaıda qarajattyń qaıdan alynǵany týraly málimet suratý; Baqylaýdy kúsheıtý: Iri kólemdegi jáne erekshe (standartty emes) operasııalarǵa basa nazar aýdarý; Kúmándi kelisimderdi toqtatý: Kúdikti tranzaksııalar bolǵan jaǵdaıda operasııany toqtatyp, bul týraly Ulttyq bankke dereý habarlaý; Málimetterdi saqtaý: Júrgizilgen aıyrbastaý operasııalary týraly derekterdi keminde bes jyl boıy muraǵatta saqtaý.Qyrǵyzstan Ulttyq banki bekitken bul jańa erejeler 14 qańtardan bastap resmı túrde kúshine enedi.