Ál-Farabı atyndaǵy Qazaq ulttyq ýnıversıtetindegi birqatar oqý korpýstarynyń shatyryna kún panelderi ornatyldy. Atap aıtqanda, Ekonomıka jáne bıznes joǵary mektebi, jýrnalıstıka, zań, tarıh, geografııa, bıologııa, fılologııa jáne medısına fakýltetteriniń ǵımarattary kún panelderimen jabdyqtaldy, dep jazady Egemen.kz.
Atalǵan joba energııany únemdeýge jáne elektr qýatyna ketetin shyǵyndy aıtarlyqtaı azaıtýǵa septigin tıgizedi.
Energııa óndirý stansııasy kelisim sheńberinde Qytaı tarapymen birlesip 20 myń sharshy metr aýmaqqa salyndy. Joba iske qosylǵannan keıin oqý ordasynyń elektr energııasyna degen qajettiliginiń bir bóligi balamaly kózder arqyly qamtamasyz etiledi. Bul stýdentter men qyzmetkerlerge turaqty, ekologııalyq taza energııany paıdalanýǵa múmkindik beredi, sonymen qatar ýnıversıtettiń ınnovasııalyq ımıdjin nyǵaıtady.
Bolashaqta josparǵa sáıkes QazUÝ qalashyǵyndaǵy barlyq fakýltetter men jataqhanalar kún panelderimen qamtamasyz etiledi. Buǵan qosymsha qalashyqtaǵy oqý korpýstary men ákimshilik ǵımarattarynyń, stýdentter úıiniń, ǵylymı ortalyqtardyń shatyrlary tolyq jańartylady. Shatyrdaǵy eski jabyndylar alynyp, tegisteý jumystary júrgizildi. Keıin qara qaǵaz tóselip, sýaǵar júıesi ornatyldy. Atalǵan sharalar nysannyń uzaq merzimge qyzmet etýin qamtamasyz etý baǵytynda atqarylyp jatyr.