Premer-mınıstrdiń birinshi orynbasary Roman Sklıar XINFA GROUP basqarma tóraǵasynyń orynbasary Chjao Tınıýnmen elimizde salynatyn zamanaýı ónerkásiptik park qurylysynyń ınvestısııalyq ózara is-qımyl jáne praktıkalyq aspektileri máseleleri boıynsha kezdesý ótkizdi, dep jazady Egemen.kz.
Pavlodar oblysynda tolyq sıkldi aýqymdy ónerkásiptik park qurý jónindegi ınvestısııalyq jobanyń tujyrymdamasy kómirden, boksıtterden, mystan, flıýorıtten jáne áktastan joǵary qaıta bólý ónimderin shyǵarý maqsatynda shıkizatty tereń óńdeýdi kózdeıdi. Atap aıtqanda, alıýmınıı jáne mys óndirý boıynsha metallýrgııa óndiristerin salý, jańartylatyn energııa kózderi bazasyndaǵy nysandardy qosa alǵanda, energetıkalyq ınfraqurylymdy qalyptastyrý, sondaı-aq soda, kómirtekti materıaldar óndiretin kásiporyndardy iske qosý josparlanyp otyr. Investısııalardyń jıyntyq kólemi shamamen 15 mlrd dollar deńgeıinde baǵalanady. Bolashaq ındýstrııalyq parktiń aýdany – 3 myń gektardan astam dep belgilengen.Xinfa Group basqarma tóraǵasynyń orynbasary Chjao Tınıýn kompanııa boksıt, kómir jáne mys ken oryndaryn qosa alǵanda, Qazaqstannyń resýrstyq bazasyna aldyn ala taldaý júrgizgenin jáne tereń óńdeý tizbegin qalyptastyrý men qosylǵan quny joǵary ónim shyǵarý isinde de olardyń ónerkásiptik áleýetin oń baǵalaıtynyn atap ótti.Roman Sklıar Prezıdent Qasym-Jomart Toqaevtyń baǵytyna súıene otyryp, ónerkásiptik jańǵyrtýdy, strategııalyq ınvestısııalardy tartýdy jáne tehnologııalyq ındýstrııany damytýdy memlekettik ekonomıkalyq saıasattyń negizgi basymdyqtary retinde qarastyratynyn atap ótti. Úkimet halyqaralyq ındýstrııalyq toptarmen uzaqmerzimdi áriptestik tetikterin qosa alǵanda, iri ınvestısııalyq jobalardy súıemeldeý úshin ornyqty quqyqtyq jáne ınstıtýsıonaldyq baza qalyptastyrdy.Kezdesý qorytyndysy boıynsha jobany odan ári egjeı-tegjeıli pysyqtaýǵa, ındýstrııalyq áriptestikti keńeıtýge jáne uzaqmerzimdi ınvestısııalyq yntymaqtastyqty nyǵaıtýǵa kelisti.