2025 jyldyń jeltoqsanynda elimizde emdelýge arnalǵan zeınetaqy qarajatyn alý kúrt kóbeıdi. Birinshi kredıttik bıýronyń dereginshe, bir aıdyń ishinde radıohırýrgııaǵa, sonyń ishinde gamma-pyshaq pen kıberpyshaq arqyly qaterli isikti emdeýge baǵyttalǵan 7 154 ótinim oryndalǵan. Jalpy tólem kólemi 5,6 mlrd teńgege jýyqtady, dep jazady Egemen.kz.
Bul kórsetkish buryn-sońdy bolmaǵan deńgeıge jetti. Salystyrý úshin aıtsaq, 1 jeltoqsanǵa deıin baǵdarlama iske qosylǵannan beri osy sanat boıynsha bar bolǵany 507 ótinim oryndalyp, 548 mln teńge tólengen. О́sim qarasha aıynda bastalǵan. Ol kezde 236 ótinim maquldanyp, 204 mln teńge bólingen. Al 2025 jyldyń basynda radıohırýrgııa boıynsha aı saıynǵy ortasha kórsetkish 10 ótinimnen aspaǵan.
Birinshi kredıttik bıýro bul jaǵdaıdy zeınetaqy tólemderindegi kezekti anomalııa dep baǵalap otyr. Mundaı kúrt ósimder qyrkúıek aıynda stomatologııalyq qyzmetterge tólem jasaýǵa tyıym salynǵannan keıin baıqala bastaǵan. Shekteý kóptegen jalǵan qujattar anyqtalǵan soń engizilgen. Buǵan deıin medısınalyq zeınetaqy tólemderiniń negizgi bóligi dál osy stomatologııaǵa tıesili bolǵan.
Buǵan deıin zeınetaqy qorynan tis emdeýge 200 mlrd teńge zańsyz shyǵarylǵanyn jazǵan edik.
Tyıym salynǵannan keıin azamattar oftalmologııalyq qyzmetterge jappaı ótinish bere bastaǵan. Qyrkúıek pen qazan aılarynda bul baǵytta da kúmándi belsendilik tirkelip, jeltoqsannyń basynda kóz aýrýlaryn emdeýge arnalǵan ótinimder qabyldaý toqtatyldy.
Qarasha aıynda plastıkalyq operasııalar boıynsha da osyndaı serpilis baıqaldy. Bul baǵytqa shekteýler jeltoqsannyń ortasynan bastap engizile bastady.
Nátıjesinde qazirgi tańda emdelýge arnalǵan zeınetaqy tólemderiniń negizdemeleri edáýir qysqardy. PKB málimetinshe, tizimde tek tar beıindi ári aýyr medısınalyq baǵyttar ǵana qaldy.
Atap aıtqanda, radıohırýrgııadan bólek, orfandyq aýrýlardy emdeý, radıonýklıdti jáne radıoıodterapııa, sondaı-aq protondy terapııa qarastyrylǵan. Jeltoqsan aıynda bul sanattar boıynsha da ósim baıqalǵanymen, ázirge ótinimder sany júzdep ne myńdap eseptelmeıdi.
Eske salaıyq, 2026 jyly zeınetaqy jınaǵynyń jetkilikti shegi orta eseppen 10 paıyzǵa ósti.