Saran qalasynda turatyn sýretshi Vıktorııa Lappanyń otbasynda jyl saıynǵy erekshe dástúr bar. Ol ár jańa jylda toqash úı pisirýdi ádetke aınaldyrǵan. Bıyl otbasy qalalyq Mádenıet úıi pishinindegi erekshe toqash úı jasap, jergilikti pablıkterdiń nazaryn aýdardy, dep jazady Egemen.kz.
Vıktorııanyń aıtýynsha, bul ıdeıa qalalyq stadıon aýmaǵyndaǵy ǵımarat qabyrǵasyn tapsyryspen boıap júrgende kelgen.
«Sol sátte «nege bizdiń Mádenıet úıimizdi toqash túrinde jasap kórmeske?» dep oıladym. Balalar bul oıdy birden qoldap, qýana-qýana pisirip, birge jınadyq. Eskızdi ózim jasaǵanymmen, bólshekterin qamyrdan qolmen qıyp shyqtym. Qurastyrý ońaı boldy. Ádette birdeńe qulap nemese ustamaı qalatyn, al bul joly bári birden shyqty. Tek shatyry sál syrǵyp ketti, ony glazýrmen tez bekittik», dedi Vıktorııa.
Aspaz ári sýretshi retinde tátti toqash pisirýdiń basty qupııasy jaqsy kúıdirilgen qant daıyndaý ekenin aıtty.
Toqash úı pisirý men qurastyrý barysyn Vıktorııa únemi vıdeoǵa túsiredi. Bul jazbalar otbasynyń jeke muraǵatynda saqtalyp, balalarymen birge qaıta-qaıta qaralady. Bıyl da dástúr ózgergen joq.
«Vıdeony óz paraqshama jarııaladym, keıin qurbym qalalyq pablıkti belgilep kórýge keńes berdi. Olarǵa vıdeo qatty unady, birlesip jarııalaýdy usyndy. Keıin basqa pablıkter, onyń ishinde qaraǵandylyq paraqshalar da beıneni bólisýge ruqsat surady. Kóbine jyly pikirler jazylady, olardy oqyp, qýanamyz», dedi Vıktorııa.
Qalalyq Mádenıet úıi beınesindegi toqash úıdi qurastyrý vıdeosy otbasy muraǵatynyń bir bólshegi ǵana emes, sonymen qatar jyly ári este qalarlyq jańa jyldyq oqıǵaǵa aınaldy.