Birpalataly jańa Parlamenttiń ataýy qarastyryldy

Jumys toby byltyr 8 qazanda Prezıdent ókimimen qurylǵan edi. Alǵashqy otyrysy Memleket basshysynyń qatysýymen 14 qazanda ótti. Sol kúni Prezıdent tapsyrmasy boıynsha azamattardyń parlamenttik júıeni jetildirýge qatysty usynystaryn jınaqtaý maqsatynda e-Otinish platformasy men eGov servısinde «Parlamenttik reforma» arnaıy bólimi ashyldy.

Jumys tobynyń 2 jeltoq­san­da ótken ekinshi otyrysynda jańa Parlamentti qalyptastyrý máseleleri qarastyryldy.

Úshinshi otyrys 29 jeltoq­sanda uıymdastyrylyp, bola­shaq Parlamenttiń zań shyǵarý úderisiniń negizgi tetikteri talqylandy.

Memlekettik keńesshi aldaǵy reformaǵa qatysty qoǵamda jar­ty jylǵa jýyq ýaqyt boıy keń kólemde talqylaý júr­gizi­lip kele jatqanyn eske sal­dy. Sonymen qatar Erlan Qarın parlamenttik reforma Mem­leket basshysy bastamashy bolǵan aýqymdy saıası jańǵyrýdyń bir bóligi ekenin atap ótti. Oǵan 2019–2021 jyldary júzege asyrylǵan saıası reformalardyń tórt paketi men 2022 jylǵy Konstıtýsııalyq reforma jatady. Jalpy alǵanda, Prezıdenttiń barlyq reformasy memlekettiń ınstıtýsıonaldyq ornyqtylyǵyn nyǵaıtýǵa, saıası júıeni zamanaýı talaptarǵa beıimdeýge baǵyttalǵan.

Jıynda Parlamentarızm ınstı­týty­nyń dırektory Natalıa Pan azamattardan, sa­rap­­­shy­lardan jáne qoǵam bel­­sen­­dilerinen kelip túsken usy­­nystar jóninde jınaqtal­ǵan aq­pa­ratpen bólisti. Búgin­ge deıin e-Otinish jáne eGov platformalaryn­daǵy «Par­lamenttik reforma» arnaıy bólimi arqyly Jumys tobyna halyq arasynan, sarapshylar qaýymdastyǵynan jáne qoǵamdyq birlestikterden 500-den astam usynys kelip tústi.

Bul jolǵy otyrystyń ne­gizgi taqyryby bolashaq Parla­menttiń basqa da bılik ınstıtýttarymen ózara is-qımyl máselelerine jáne birpalata­ly jańa Parlamenttiń ataýyn qarastyrýǵa arnaldy.

Jumys toby jetekshisiniń orynbasary – Prezıdenttiń quqyqtyq máseleler jónindegi kómekshisi Erjan Jıenbaev bola­shaq Parlamenttiń memle­­ket­­tik bıliktiń basqa da ınstı­týt­­tary­­men ózara is-qımyly kezindegi óki­let­tikterine qatysty jalpy tá­silder týraly aıtty. Bul tásilder Jumys toby múshe­leri men saıası partııalardyń usynystary negizinde ázirlengen.

Jumys tobynyń Azat Perýashev, Marat Shıbutov, El­nur Beısenbaev, Marat Bashımov, Indıra Áýbákirova, Ashat Rahymjanov, Alýa Ibraeva, Únzıla Shapaq, Qarly­ǵash Ja­man­qulova, Erlan Sársem­baev sekildi músheleri kún tártibin­degi máselelerge qatysty óz ıdeıalary men usynystaryn ortaǵa saldy.

Otyrys barysynda Jumys tobynyń músheleri el Konstı­týsııasyna engiziletin aldaǵy ózgeristerdiń aýqymdy ekenin jetkizdi. Bul ózgerister zań shyǵarýshy bılik jumysynyń tıimdiligin arttyryp qana qoımaı, negizgi memlekettik ıns­tıtýttar arasyndaǵy ózara is-qımyldyń tutas júıesin edáýir jańǵyrtýǵa múmkindik beredi.

Jıyn qorytyndysy boıynsha Jumys tobynyń jetekshisi – Memlekettik keńesshi kelip túsken usynystardyń barlyǵyn jınaqtap, jan-jaqty taldaýdy tapsyrdy.

Parlamenttik júıeni jetil­dirýge qatysty tásilderdi ázirleý isi Jumys tobynyń aldaǵy otyrystarynda kezeń-kezeńimen jalǵasady.