1860 jyly prezıdenttik saılaýǵa úsh apta qalǵanda, Nıý-Iork shtatynyń Ýestfıld qalasynda turatyn Greıs Bedell esimdi on bir jasar qyz prezıdenttikke kandıdat Lınkolnge úshbý hat jazady. Ol Lınkolnge ákesi úıge ákelgen plakattaǵy sýretti kórgennen keıin hat joldaǵysy kelgenin aıtady.
«Meniń tórt aǵam bar, olardyń ekeýi sizge daýys bermekshi, al eger saqalyńyzdy ósirseńiz, qalǵan eki aǵamdy da sizge daýys berýge kóndiremin. Betińiz tym sopaqsha. Sol úshin saqal ósirseńiz, álpetińiz áldeqaıda jaqsy kóriner edi», deıdi ol óz usynysyn jasyrmaı.
Greıs Bedell hatynyń basynda Lınkolnnen «Qyzyńyz bar ma?» dep suraıdy. Araǵa tórt kún salyp Lınkoln oǵan jaýap qaıtarady. Ol aldymen «Qyzyńyz bar ma?» degen suraqqa jaýap beredi.
«Qurmetti kishkentaı hansha! Meniń qyzym joq. Biraq úsh ulym bar. Olar on jeti, toǵyz jáne jeti jasta. Uldarym otbasymnyń basty músheleri ekenin aıtqym keledi. Al saqalǵa keletin bolsaq, budan buryn eshqashan saqal qoımaǵanmyn. Eger dál qazir saqalymdy ósirsem, jurt bul qylyǵymdy aqymaqtyq dep oılamas pa? Bul týraly siz qalaı oılaısyz?
Sizge tilekshi A.Lınkoln».
Kóp ótpeı Greıs Bedell saqaldyń Abram Lınkolnge qalaı qup jarasqanyn óz kózimen kórý múmkindigine de ıe boldy. Illınoıs shtatynyń Sprıngfıld qalasynan Vashıngtondaǵy ınaýgýrasııasyna bara jatqan jolynda prezıdenttikke saılanǵan Abraham Lınkoln Greıs Bedell turatyn Ýestfıld qalasyna arnaıy at basyn burady. Sol kezdesýde Lınkoln oǵan «Kórdiń be, saqalymdy sen úshin ósirdim, Greıs» dep aǵynan aqtarylady.