Bıylǵy 1 qańtardan bastap memlekettik járdemaqylardyń, bazalyq, yntymaqty zeınetaqylardyń barlyq túrleriniń mólsheri artty. Ulttyq bank aıqyndaıtyn ınflıasııanyń boljamdy deńgeıine sáıkes 10%-ǵa ulǵaıtyldy.
Eńbek jáne halyqty áleýmettik qorǵaý mınıstrliginiń málimetinshe, Memleket basshysynyń tapsyrmasyna oraı, 2023 jyldan bastap bes jyl ishinde eń tómengi bazalyq zeınetaqyny eń tómengi kúnkóris deńgeıiniń 70%-yna deıin, eń joǵarǵy zeınetaqy mólsherin 120%-ǵa deıin jyl saıyn kezeń-kezeńimen arttyrý júzege asyrylyp jatyr.
Aıtalyq, bıylǵy 1 qańtardan bastap bazalyq zeınetaqynyń eń tómengi mólsheri 35 596 teńgege (eń tómengi kúnkóris deńgeıiniń 70%-y), eń joǵary mólsheri eń tómengi kúnkóris deńgeıiniń 110%-ynan 118%-yna deıin artyp, 60 005 teńgege jetti. 2019 jyly zeınetkerlik demalysqa shyqqan 70 jastaǵy zeınetkerdiń bıýdjetten tólenetin zeınetaqysynyń mólsheri 2025 jyly 171 588 teńge boldy, onyń ishinde bazalyq zeınetaqy tólemi – 50 851 teńge, yntymaqty zeınetaqy – 120 737 teńge. 2026 jylǵy 1 qańtardan zeınetaqynyń jalpy somasy 192 816 teńgege deıin ulǵaıady, onyń ishinde bazalyq zeınetaqy – 60 005, yntymaqty zeınetaqy – 132 811 teńgege jetedi. Bul somalarǵa BJZQ tólemderi kirmeıdi.
1 qańtardan bastap memlekettik járdemaqylardyń da mólsheri artady. Mysaly 1, 2, 3 bala týǵanda beriletin járdemaqy bir rettik 149 416 teńgeden 164 350 teńgege deıin, 4, odan da kóp bala týǵandarǵa berilip kelgen 247 716 teńge somasy 272 475 teńgege deıin ulǵaıady. Kópbalaly otbasylarǵa beriletin járdemaqy da 10 %-ǵa artty. Tórt balasy bar otbasylarǵa 63 030 teńgeden 69 330 teńgege deıin, 10 balasy barlarǵa 157 280 teńgeden 173 000 teńgege deıin kóbeıdi. Sonymen qatar I toptaǵy múgedektigi bar adamdarǵa arnalǵan járdemaqy 101 702 teńgeden 111 872 teńgege deıin, II toptaǵylarǵa – 81 362 teńgeden 89 498 teńgege deıin, III toptaǵylarǵa 55 474 teńgeden 61 021 teńgege deıin ulǵaıady.
Asyraýshysynan, eńbek etý qabiletinen aırylǵan jandarǵa Memlekettik áleýmettik saqtandyrý qorynan (MÁSQ) beriletin tólemder de 10%-ǵa artty. Bul tólemder mindetti áleýmettik saqtandyrý júıesine qatysýshylarǵa bıýdjetten tólenetin memlekettik járdemaqylarǵa qosa beriledi. Tólem somasy keıingi 2 jylda MÁSQ-ǵa áleýmettik aýdarymdar júrgizilgen ortasha aılyq tabysqa, eńbek etý qabiletinen aıyrylý koeffısıentterine, asyraýyndaǵy adamdar sanyna, mindetti áleýmettik saqtandyrý júıesine qatysý ótiline, tabysty almastyrýǵa baılanysty esepteledi.