Muhtar Áýezov atyndaǵy Qazaq ulttyq drama teatrynyń 100 jyldyǵyna oraı Almaty qalasynda «Eńlik–Kebek» spektakliniń mereıtoılyq kórsetilimi ótti. Aıtýly shara – ult rýhanııatynyń qalyptasý jolyna, kásibı qazaq teatrynyń tarıhyna taǵzym etken mańyzdy mádenı oqıǵa boldy.
«Eńlik – Kebek» tragedııasy – qazaq kásibı teatrynyń shejiresinde aıryqsha orny bar týyndy. Spektakl tarıhy 1917 jyly Oıqudyq jaılaýyndaǵy qoıylymynan bastalyp, 1926 jyly Qyzylorda qalasynda shańyraq kótergen memlekettik ult teatrynyń bedeldi qoıylymdarynyń biri retinde tasqa basyldy. Ǵasyrdan astam ýaqyt boıy kórermenin joǵaltpaǵan shyǵarma mahabbat pen adaldyqty, adamgershilik pen ar-ojdandy arqaý etip, ulttyń rýhanı qundylyqtaryn dáriptep keledi.
Mereıtoılyq qoıylymda klassıkalyq týyndynyń ıdeıalyq salmaǵy men kórkemdik qýaty zamanaýı sahnalyq sheshimdermen astasyp, kórermenge aıryqsha áser syılady. Tragedııalyq mahabbat hıkaıasy arqyly qoǵamdaǵy qatygezdik pen ádiletsizdik, jeke tulǵanyń erkindigi men salt-dástúr tartysy kórkem túrde beınelendi. Spektakl ár býyn kórermenine oı salyp, júrekke jol taba bildi.
Sonymen qatar ataýly keshtiń mańyzdy bóligi retinde teatr mýzeıi uıymdastyrǵan «Ulttyq teatr jáne «Eńlik – Kebek» qoıylymy» atty arnaıy ekspozısııa kópshilik nazaryna usynyldy. Kórmede qazaq kásibı teatrynyń alǵashqy qadamdaryn aıǵaqtaıtyn sırek fotosýretter, sahna kostıýmderi, rejısserlik jazbalar, arhıvtik qujattar men tarıhı derekter qamtyldy. Bul jádigerler kórermendi HH ǵasyr basyndaǵy shyǵarmashylyq ortaǵa jetelep, teatr óneriniń qalaı qalyptasyp, kemeldengenin kóz aldyna ákeldi.
Aıta keterligi, «Eńlik – Kebek» tragedııasy ár kezeńde túrli rejısserlik ınterpretasııamen sahnalanyp, ulttyq sahnada úzdiksiz jańǵyryp keledi. Ol – qazaq teatrynyń kórkemdik izdenisterin, estetıkalyq evolıýsııasyn aıqyndaıtyn aıryqsha ólshem. Sondyqtan tarıhy sonaý Oıqudyq jaılaýynan bastalyp, kásibı qazaq teatry tórinde qaıta jandanǵan bul qoıylymnyń óner ordasynyń 100 jyldyq mereıtoıynda qaıta usynylýy – tarıhı zańdylyq ári rýhanı sabaqtastyqtyń jarqyn kórinisi.
Ǵasyrlyq tarıhty enshilegen M.Áýezov teatry mereıtoılyq maýsym arqyly ótkenge qurmet pen búgingi shyǵarmashylyq bıikti ushtastyra otyryp, osylaısha ulttyq ónerdiń bolashaǵyna nyq qadam jasady. Al «Eńlik – Kebek» sol uly joldyń irgeli murasy ári máńgilik rámizi retinde qazaq sahnasynyń tórinen óz ornyn taǵy bir márte aıqyn kórsetti.