Qazaqstan men О́zbekstan Syrdarııa ózeninde on avtomattandyrylǵan gıdrobeket ornatý jobasyn iske asyrýdy josparlap otyr. Germanııanyń Halyqaralyq yntymaqtastyq qoǵamynyń (GIZ) qoldaýymen ázirlengen bul joba transshekaralyq sýdy bólýdiń ashyqtyǵy men dáldigin qamtamasyz etýge baǵyttalǵan. Qazirgi ýaqytta GIZ osy joba boıynsha tehnıkalyq tapsyrmany ázirleý aıaqtaldy, dep habarlaıdy Egemen.kz.
Túrkistan qalasynda Qazaqstan men О́zbekstan arasyndaǵy sý qatynastarynyń barlyq baǵyty boıynsha ekijaqty yntymaqtastyqty tereńdetý baǵytyndaǵy birlesken jumys tobynyń XIII otyrysy, sondaı-aq Ortalyq Azııada ózara tıimdi ári ornyqty sý-energetıkalyq yntymaqtastyq tetigin ázirleý jónindegi kúsh-jigerdi úılestirýge baǵyttalǵan qazaq-ózbek birlesken jumys tobynyń II otyrysy ótti.
Otyrystarǵa QR Sý resýrstary jáne ırrıgasııa mınıstri Nurjan Nurjigitov, О́zbekstan Respýblıkasynyń Sý sharýashylyǵy mınıstri Shavkat Hamraev jáne Túrkistan oblysynyń ákimi Nuralhan Kósherov qatysty.
Otyrysta «Dostyq» memleketaralyq kanalyn tazalaý jáne jóndeý jumystary qaraldy. Byltyr Qazaqstan tarapy kanaldyń ýchaskelerinde, eńisterinde, kollektorlarynda jáne bas qurylysjaılarynda mehanıkalyq tazalaý jumystaryn júrgizdi.
Qazaqstan men О́zbekstan prezıdentteri birlesken jobalardy iske qosý rásimine qatysty
Sonymen qatar nysannyń bas jáne bógeıtin qurylysjaılaryndaǵy qaqpalarǵa jóndeý jumystary jasaldy. Bıyl «Dostyq» kanalyn mehanıkalyq tazalaý jáne bas qurylysjaılaryn jóndeý jumystary jalǵasyn tabady.
Taraptar sondaı-aq sý únemdeý tehnologııalaryn engizý jáne paıdalaný salasynda tájirıbe almasýǵa kelisti. Syrdarııa ózeninde ár memleket aýmaǵynda bes-besten avtomattandyrylǵan gıdrobeket nysanyn salý josparlanyp otyr.
«Byltyr eki memlekettiń basshylarynyń qatysýymen biz transshekaralyq sý nysandaryn birlesip basqarý jáne utymdy paıdalaný týraly úkimetaralyq kelisimge qol qoıdyq. Bul qujat kópjyldyq jumystyń nátıjesi boldy, sonyń arqasynda transshekaralyq sýdy basqarýdyń kelisilgen tásilderin ázirleý múmkin boldy. Sondyqtan bul kelisimniń qabyldanýy tarıhı mańyzǵa ıe oqıǵa boldy. Kelisim Ortalyq Azııadaǵy sý dıplomatııasyn damytýǵa eleýli úles qosady jáne bolashaqtaǵy ózara tıimdi yntymaqtastyqtyń negizgi baǵyttaryn naqty aıqyndaıdy. Biz ekijaqty áriptestikti tatý kórshilik, ózara qurmet jáne syndarly dıalog rýhynda odan ári damytýǵa nıettimiz», dedi Sý resýrstary jáne ırrıgasııa mınıstri Nurjan Nurjigitov.
Túrkistan oblysynda jemis-jıdek óńdeıtin zaýyt iske qosyldy