«Kereı, qaıda barasyń?» dep jyrlaǵan Buqar babamyz tirilip kelse, qymbatshylyqtyń qysymyn kórip,«Baǵa, qaıda barasyń?» dep tolǵaıtyndaı kórinedi. Kim bilsin? Kúnnen-kúnge kerneýi kúsheıgen qymbatshylyq halyqtyń qaltasyna aýyr soǵyp otyr. Ásirese, úı alý máselesi kún tártibiniń basynda tur, dep jazady Egemen.kz.
AERC júrgizgen esepke súıensek, 2025 jyldyń jeltoqsanynda jańa turǵyn úı baǵasy bir jylda 15,7%-ǵa ósken. Biraq, bul ósim barlyq qalada birdeı emes. Bir óńirde baǵa qatty kóterilse, endi bir jerde ózgeris asa baıqalmaıdy.
Máselen, Qonaev pen Pavlodarda jańa páterler bir jylda 23%-ǵa qymbattaǵan. Almatyda ósim 20%-ǵa jetse, Astanada 17,4%-dy qurady. Al Petropavl men Semeıde baǵa bar bolǵany 2-3 paıyz shamasynda ǵana kóterilgen. Jeltoqsan aıynyń ózinde jańa úılerdiń quny taǵy 0,4 paıyzǵa artqan.
Baǵanyń ósýimen qatar, páter satyp alýshylar da kóbeıip keledi. Byltyr jeltoqsanda bir aıdyń ishinde 53 myńnan astam satyp alý-satý mámilesi jasalǵan. Bul qarasha aıymen salystyrǵanda úshten birine jýyq kóp. Mundaı belsendilikke birneshe sebep bar. Qurylys kompanııalary jańa Salyq kodeksi talqylanyp jatqan tusta qarqynyn báseńdetpeı otyr. Oǵan qosa, jeńildetilgen ıpoteka men memlekettik qoldaý tetikteri de naryqty ustap tur.
Elimizde turǵyn úıdi jalǵa alý baǵasy ósti. Baspana qaı aımaqta qymbatqa túsedi?
Ulttyq statıstıka bıýrosy derekteri jańa páterdiń ortasha baǵasy qazir qansha ekenin kórsetedi. 2025 jyldyń jeltoqsanynda el boıynsha bir sharshy metrdiń quny shamamen 571 myń teńgege jetken. Almatyda bul kórsetkish eń joǵary, al Oralda eń tómen deńgeıde qalyp otyr.
Al Krisha.kz saıtyndaǵy habarlandyrýlardy qarasańyz, baǵanyń odan da joǵary ekenin baıqaýǵa bolady. Munda bir sharshy metrdiń ortasha quny 556 myń teńgeden asady, al elıtalyq úılerde baǵa mıllıon teńgeden de joǵary.
Qysqasy, qazirgi kórinis bir nárseni ańǵartady: turǵyn úı naryǵynda suranys bar, qozǵalys bar. Sondyqtan ázirge úı baǵasy ózdiginen túsip ketedi dep kútý qıyn.
Qazaqstanda turǵyn úıdi jalǵa alý quny 13 paıyzǵa ósti