21 jastaǵy stýdent Nuraı Serikbaıdyń ólimi qoǵamda rezonans týǵyzdy. Alaıda atalǵan iske polısııa qyzmetkerleri nemquraıdy qaraǵan. Endi sol iske qatysy bar polıseılerge qylmystyq is qozǵalyp otyr. Bul týraly Senat kýlýarynda Ishki ister mınıstriniń orynbasary Sanjar Ádilov málimdedi, dep habarlaıdy Egemen.kz.
20 qańtar kúni Qyzylordada ótken Ulttyq quryltaıdyń V otyrysynda Memleket basshysy kisi qolynan qaza tapqan Nuraıdyń oqıǵasyna qatysty pikir bildirdi. Atalǵan máselege Prezıdent nazar aýdaryp, IIM men Bas prokýratýraǵa tikeleı baqylaý jasaýdy tapsyrǵan edi. Ile-shala Nuraı Serikbaıdyń ólimine qatysty qylmystyq is qozǵaldy.
IIM orynbasary Sanjar Ádilovtiń aıtýynsha, tergeý jábirlenýshi májbúrli nekege qatysty aryzben júgingen kezde isti tirkemegen polısııa qyzmetkerlerine qatysty júrgizilip jatyr.
«Nemquraıdylyq boıynsha qylmystyq istiń qozǵalýyna, eń aldymen, qyzmettik mindetterine sáıkes jábirlenýshiniń májbúrli nekege qatysty ótinishin tirkeý boıynsha tıisti sharalar qabyldamaǵan laýazymdy tulǵalar tartylady. Biz qazir osyny anyqtap otyrmyz. Jábirlenýshiniń aryzyn qabyldamaı, isti nomenklatýralyq tártippen esepten shyǵarǵan laýazymdy tulǵalar teris sebeptermen jumystan bosatyldy», dedi ol.
Sanjar Ádilovtiń sózinshe, eń aldymen jaýapkershilik aýdandyq polısııa basqarmasynyń laýazymdy tulǵalaryna júkteledi. Sondaı-aq tergeý aıasynda qalalyq polısııa departamenti basshylyǵynyń áreketterine de quqyqtyq baǵa beriledi.
Marqum Nuraı Serikbaıdyń aǵasynyń aıtýynsha, kúdikti uzaq ýaqyt boıy onyń qaryndasyn ańdyp, stalkıngpen aınalysqan. BAQ-ta taraǵan málimetterge sáıkes, ol qyzǵa turmysqa shyǵýǵa usynys jasaǵan. Alaıda qyz kelisimin bermegennen keıin, ony májbúrli túrde alyp qashqan. Keıin Nuraıdy týystary qaıtaryp ákelgen. Osydan soń polısııaǵa aryz jazylǵanymen, qylmystyq is qozǵalmaǵan.
Nuraı Serikbaı 11 qańtar kúni Shymkentte pyshaq jaraqattarynan qaza tapty. Áleýmettik jelide taraǵan beınejazbalarda qyzdyń qashýǵa tyrysqany, keıin qarsylyq kórsetkeni, al kúdiktiniń ony uryp, pyshaq suqqany kórinedi. Odan keıin kúdikti oqıǵa ornynan qashyp ketken.
13 qańtar kúni polısııa 28 jastaǵy kúdiktini qaladan 10 shaqyrym jerde ustady. Er adam ýaqytsha ustaý ızolıatoryna qamaldy.
Keıin Shymkent qalalyq polısııa departamenti kúdiktiniń qamaýǵa alynǵanyn habarlady.