Abaı oblysynyń mádenıet, tilderdi damytý jáne arhıv isi basqarmasyna qarasty Semeıdegi Ámire Qashaýbaev atyndaǵy memlekettik fılarmonııasynyń dırektory bolyp Qazaqstannyń Halyq ártisi, kúıshi-kompozıtor Seken Turysbekov taǵaıyndaldy, dep jazady Egemen.kz.
Seken Kárimuly 1961 jyly Úrjar aýdanynda dúnıege kelgen. Semeıdegi M.Tólebaev atyndaǵy mýzyka ýchılıshesin, keıin Qurmanǵazy atyndaǵy konservatorııany professor M.Áýbákirovtiń klasynda támamdaǵan. Eńbek ótili – 40 jyl. Ol – «Jiger» festıvaliniń jáne Máskeýde ótken jastar men stýdentterdiń dúnıejúzilik festıvaliniń laýreaty, Qazaqstan Lenın komsomoly syılyǵynyń ıegeri, Qazaqstannyń eńbek sińirgen ártisi, Qurmet jáne Parasat ordenderiniń ıegeri, Abaı atyndaǵy Memlekettik syılyqtyń laýreaty, Qazaqstannyń Halyq ártisi.
Eńbek jolyn «Sazgen» ansamblinen bastap, «Aq jaýyn» ansambli men orkestrin quryp, ony halyqaralyq deńgeıge kóterdi. Orkestr Japonııa, Qytaı, Mońǵolııa, Fransııa, Germanııa jáne ózge de elderde gastroldik saparmen óner kórsetti. Osy ýaqytqa deıin ol Súıinbaı atyndaǵy Almaty oblystyq fılarmonııasynyń «Aq jaýyn» halyq aspaptar orkestriniń kórkemdik jetekshisi qyzmetin atqaryp keldi.
Buǵan qosa Abaı oblysynyń mádenıet, tilderdi damytý jáne arhıv isi basqarma basshysy Janjigit Omarhan oblystyq Abaı teatryna akter Nartaı Sarsebaevty taǵaıyndady.
«Nartaı Saýdanbekuly – kıno jáne teatr akteri, jazýshy, dramatýrg, aýdarmashy, telejúrgizýshi, sondaı-aq dýblıaj akteri. Teatr salasyn bes saýsaǵyndaı meńgergen, tájirıbesi mol kásibı maman. Sondyqtan bul jaýapty qyzmetti abyroımen atqaratynyna senim bildiremin», dedi Janjigit Omarhan.
Abaı oblysy