Amerıkany aqtútek boran basty: 139 myń adam jaryqsyz qalyp, tótenshe jaǵdaı jarııalandy

13 000-nan astam áýe reısi toqtatylǵan

Daýyl saldarynan elde 13 000-nan astam áýe reısi toqtatyldy. Soltústik-batys, ortalyq jáne ońtústik shtattarda boran, qar jáne muz jańbyr birneshe kún boıy jalǵasady dep boljanyp oty.

24 qańtar keshke qaraı 139 myńnan astam tutynýshy elektr jaryǵynsyz qaldy, bul kórsetkish kún sanap ósip keledi. Jaryqsyz qalý oqıǵalary kóbine Tehas pen Lýızıana shtattarynda tirkelgen. Nıý-Iork kóshelerinen aýa raıynyń saldarynan úsh adamnyń máıiti tabyldy – 67 jastaǵy er adam, shamamen 30 jastaǵy jas jigit jáne qart áıel.

Tótenshe jaǵdaı engizildi

Prezıdent Donald Tramp jaǵdaıǵa baılanysty Ońtústik Karolına, Vırdjınııa, Tennessı, Djordjııa, Soltústik Karolına, Merılend, Arkanzas, Kentýkkı, Lýızıana, Mıssısıpı, Indıana, Batys Vırdjınııa shtattarynda federaldy tótenshe jaǵdaı rejımin bekitti. Ol azamattardy «qaýipsiz jáne jyly jerde bolýǵa» shaqyrdy.

AQSh Ishki qaýipsizdik mınıstrliginiń málimetinshe, daýyl kem degende 17 shtat pen Kolýmbııa okrýginde asa qıyn aýa raıy jaǵdaılaryn týǵyzdy. 12 shtatta daýyl saldaryn jeńý úshin Ulttyq ulan qyzmetkerleri jumyldyryldy.

Saldary 220 mıllıonnan astam turǵynǵa áser etýi múmkin

AQSh Ulttyq meteorologııalyq qyzmeti ony «shekteýsiz ári uzaqqa sozylatyn qysqy daýyl» dep ataǵan. Meteorologtardyń boljamynsha, daýyl ońtústik-shyǵys shtattarda muzdanýdy kúsheıtip, saldary joıqyn apatqa deıin jetýi múmkin. Nıý-Iork meri Zohran Mamdanı qalada 20-23 sm qar jaýady jáne sýyq aýa raıy qańtar aıynyń sońyna deıin saqtalady dep habarlaǵan.

Boljam boıynsha, daýyldyń saldary AQSh-taǵy 220 mıllıonnan astam turǵynǵa áser etýi múmkin.

AQSh-ta qysqy daýyldan 50 adam kóz jumdy