Prezıdent memlekettik satyp alý júıesin jańǵyrtý mindetin qoıdy jáne 2025 jylǵy qańtardan bastap kúshine engen «Memlekettik satyp alý týraly» zań qabyldandy. Qarjy vıse-mınıstri Dáýren Keńbeıil qabyldanǵan sharalar naryq qatysýshylary úshin de, jalpy júıe úshin de aıtarlyqtaı nátıje kórsete bastaǵanyn aıtty. Zań taýarlar, jumystar men qyzmetterdi jetkizýshiler úshin ashyq ári básekege qabiletti jaǵdaı qalyptastyrýǵa múmkindik berip, sybaılas jemqorlyq táýekelderin barynsha azaıtty, dep habarlaıdy Egemen.kz Úkimettiń baspasóz qyzmetine silteme jasap.
Onyń aıtýynsha, reformanyń basty nátıjesi satyp alý rásimderiniń merzimin túbegeıli qysqartý jáne artyq bıýrokratııalyq kedergilerdi joıý boldy.
«О́tken jyldyń 1 qańtarynan bastap elimizde memlekettik satyp alýlar týraly jańa zań kúshine endi. Bul zań satyp alý rásimderin jedeldetý, satyp alynatyn taýarlardyń, jumystar men kórsetiletin qyzmetterdiń sapasyn arttyrý, sondaı-aq satyp alý prosesterin odan ári avtomattandyrý baǵytynda mańyzdy betburys boldy», dedi ol.
Reformanyń basty elementi – reıtıngtik-baldyq júıe qoldanylatyn konkýrstyq rásim, onda sheshimder adam qatysýynsyz, avtomatty túrde, JI elementterin paıdalaný arqyly qabyldanady.
«Qorytyndylar bes kún ishinde shyǵarylady. Reıtıngtik-baldyq júıeniń negizgi krıterııleri: jumys tájirıbesi, kompanııanyń qarjylyq turaqtylyq kórsetkishi, belgili bir ákimshilik-aýmaqtyq birlikke tıesiligi jáne t.b. Salystyrý úshin aıtsaq, bul zań qabyldanǵanǵa deıin konkýrstyq rásimder keminde 60 kúnge sozylsa, reıtıngtik-baldyq júıe engizilgennen keıin bul rásimder orta eseppen 5 kúnde aıaqtalady. Reıtıngtik-baldyq júıe qoldanylmaǵan jaǵdaıda, ádettegi konkýrstar 10 jumys kúnine deıin sozylady», dedi Dáýren Keńbeıil.
Reıtıngtik-baldyq júıeni qoldaný tájirıbesi óńirlik deńgeıde óz nátıjesin kórsete bastady, mysaly:
Aqmola oblysynda 6 jumys kúni ishinde quny 1,8 mlrd teńge bolatyn sport kesheniniń qurylysyna qatysty memlekettik satyp alý boıynsha jeńimpaz anyqtalyp, merdiger retinde Kókshetaý qalasyndaǵy jergilikti «Stroı BK» JShS tanyldy.
Ulytaý oblysynda 5 jumys kúni ishinde quny 1,1 mlrd teńge bolatyn jalpy bilim beretin mektep qurylysy boıynsha konkýrs jeńimpazy anyqtalyp, merdiger bolyp Jezqazǵan qalasyndaǵy óńirlik «Astana Premıým Stroı» JShS belgilendi.
Osylaısha, vıse-mınıstr atap ótkendeı, jańa zań birqatar bıýrokratııalyq rásimdi alyp tastaýǵa, satyp alýlardy jeńildetýge jáne merzimderdi edáýir qysqartýǵa múmkindik berdi.
Otandyq taýar óndirýshiler sertıfıkat alý kezinde kedergige tap bolyp otyr
Sonymen qatar reforma otandyq taýar óndirýshilerdi qoldaýǵa baǵyttaldy. Zańda kompanııalardy qamtamasyz etýdiń barlyq túrinen bosatý, aıyppul sanksııalaryn azaıtý, taýar jetkizýdiń eń mınımaldy merzimin 15 kúnnen 60 kúntizbelik kúnge deıin uzartý, sondaı-aq tólem merzimin 30 jumys kúninen 10 jumys kúnine deıin qysqartý qarastyrylǵan.
Nysandardy salýda EPC jáne EPC-F kelisimsharttary túrindegi jańa quraldar engizildi, bul satyp alý prosesin jáne jalpy qurylys jumystaryn jedeldetýge múmkindik berdi. Bıýrokratııalyq rásimderdiń qysqartylýy aıtarlyqtaı ekonomıkalyq tıimdilikke qol jetkizýdi qamtamasyz etti.
Memlekettik satyp alý týraly jańa zań otandyq kompanııalar úshin mańyzdy preferensııalardy bekitti. Sonyń arqasynda otandyq óndirýshilerge kelisimsharttar jasasý kezinde basymdyq berý quqyǵy, shart somasynyń 50% kóleminde mindetti avans tóleý, sondaı-aq banktik kepildikter usynýdan bosatý jáne aıyppul sanksııalary boıynsha jeńildetilgen talaptar qarastyrylǵan.
«Bul sharalar otandyq taýar óndirýshilerdi qoldaýǵa, sondaı-aq otandyq óndiristi yntalandyrýǵa baǵyttalǵan. Atalǵan sharalar ótken jyldyń qorytyndysy boıynsha otandyq óndirýshilermen jasalǵan kelisimsharttar sanyn edáýir arttyrýǵa, sondaı-aq otandyq óndirýshilermen jasalǵan kelisimsharttardyń jalpy somasyn ulǵaıtýǵa múmkindik berdi», dep túsindirdi vıse-mınıstr.
Otandyq taýar óndirýshilerdiń tizilimi tolyqtyryldy