Qazaqstan Respýblıkasynyń jańa Konstıtýsııasyn qabyldaý qajettigi Konstıtýsııalyq reforma jónindegi komıssııanyń besinshi otyrysynda talqylandy. Májilis depýtaty Snejanna Imasheva jańa túzetýler Konstıtýsııanyń 77 babyna engizilip, negizgi zań mátininiń 84 paıyzyn jańartatynyn, is júzinde barlyq bólim qamtylatynyn aıtty, dep habarlaıdy Egemen.kz.
Imasheva baıandamasynda jobanyń Preambýlasyn tolyq jańa redaksııada qabyldaý, jańartylǵan jalpyulttyq qundylyqtar, memlekettiń mıssııasy, tarıhı kontekst pen eldiń odan ári damý baǵyttaryn kórsetý kózdeletinin atap ótti. Sonymen qatar «Halyq keńesi» jáne «Konstıtýsııaǵa ózgerister men tolyqtyrýlar engizý» atty eki jańa bólim engizilip, tórt bólimniń ataýy men mazmunyna ózgerister engizilmek.
Erlan Qarın: Jańa Konstıtýsııa Qazaqstannyń kemeldengen memlekettigin kórsetedi
«Konstıtýsııalyq qurylymnyń negizderi eleýli túrde qaıta qaralyp, prezıdenttik basqarý nysany saqtala otyryp, biryńǵaı memlekettik bılik júıesiniń uıymdastyrylýy ózgeredi. Azamattardyń memleket isin basqarýǵa qatysý nysandary keńeıtilip, adam men azamattyń quqyqtary men bostandyqtaryn qorǵaý kepildikteri kúsheıtiledi, Konstıtýsııalyq Sottyń Konstıtýsııanyń ústemdigin qamtamasyz etýdegi róli arta túsedi. Osylaısha, sóz jekelegen túzetýler týraly emes, Negizgi zańnyń mazmuny men tujyrymdamalyq tásilderin túbegeıli ózgertetin tereń konstıtýsııalyq jańǵyrtý týraly bolyp otyr», dedi depýtat.
Aıda Balaeva: Konstıtýsııalyq reforma – el damýynyń ádildik pen zań ústemdigine negizdelgen jańa modeli
Depýtat sonymen qatar «Quqyqtyq aktiler týraly» Zańnyń 26-babynyń 9-tarmaǵyn eske salyp, normatıvtik aktiniń jartysynan astamy ózgerse, onyń jańa redaksııasy qabyldanatynyn atap ótti. Osyǵan súıene otyryp, jańa Konstıtýsııa qazirgi zaman talaptaryna, qoǵam suranysyna jáne memlekettiń strategııalyq damý maqsattaryna saı keletini, tek quqyqtyq negizdi ǵana emes, sonymen birge azamattyq qundylyqtar men memlekettiń strategııalyq baǵytyn kórsetetin qujat ekeni kórsetildi.