Bılik pen qoǵam arasyndaǵy ózara senimge negizdelgen jańa qoǵamdyq kelisimdi qalyptastyrý – «Keńesip pishken ton kelte bolmas» atty ulttyq ustanymǵa negizdelgen. Sondaı-aq, memlekettik basqarýdyń mazmuny men arhıtektýrasyn túbegeıli jańartý mindeti de qoǵam talqysyna salynyp otyr. Bul týraly Konstıtýsııalyq komıssııanyń kezekti otyrysynda Májilis depýtaty Janarbek Áshimjan málimdedi, dep habarlaıdy Egemen.kz.
«Sońǵy jyldary qabyldanǵan sheshimder osy maqsatqa júıeli túrde qyzmet etip keledi. Atap aıtqanda, buryn bolǵan Prezıdent kvotalary men taǵaıyndaýlardan bas tartý arqyly ókildi bıliktiń derbestigin kúsheıtýge, saıası júıeni naqty demokratııalandyrýǵa baǵyt aldyq. «Tepe-teńdik bar jerde turaqtylyq bar» degen saıası qaǵıdatqa súıensek, júzege asyrylǵan reformalar bılik tarmaqtary arasyndaǵy teńgerimdi nyǵaıtyp, ınstıtýsıonaldyq damýdyń jańa kezeńin qalyptastyrdy», dep atap ótti ol.
Májilis depýtatynyń aıtýynsha, osy logıkanyń zańdy jalǵasy retinde Quryltaıdyń ókilettikterin keńeıtý máselesi kún tártibine shyqty. Quryltaıǵa Konstıtýsııalyq sotty, Joǵary aýdıtorlyq palatany jáne Ortalyq saılaý komıssııasyn qalyptastyrýǵa qatysý quqyǵyn berý – bul ınstıtýttardyń táýelsizdigin arttyryp qana qoımaı, olardyń halyq aldyndaǵy jaýapkershiligin kúsheıtedi.
Murat Abenov: Ata Zańdaǵy referendým uǵymy men ataýyna qatysty ózgerister jasaldy
«Dál osy tusta biz búgin talqylap otyrǵan Halyq keńesi ınstıtýtynyń mańyzy aıqyn kórinedi. Halyq keńesi jaı ǵana konsýltatıvtik alań emes, memleket pen qoǵam arasyndaǵy jańa áleýmettik kelisimniń ınstıtýsıonaldyq kórinisi. Memlekettik ınıstıtýttardyń belgilengen reglament aýmaǵynda jumys isteıtini belgili. Al, Halyq keńesiniń aýqymdylyǵy – álgindeı alańdarda qordalanǵan, jınaqtalǵan túrli usynystardy, pikirlerdi, kózqarastardy bir alańda toǵystyryp, aıtylǵan sóz aıtylǵan jerde qalmaı naqty tetikke aınaldyrý», dedi J.Áshimjan.
Onyń pikirinshe, barlyq etnostardyń múddesin qamtıtyn Halyq keńesine konstıtýsııalyq negiz berý strategııalyq turǵydan mańyzdy. Halyq keńesi birtutas Qazaqstan halqynyń múddesine qyzmet etip, ishki saıasat, qoǵamdyq kelisim jáne ulttyq qundylyqtar máseleleri boıynsha kásibı usynystar ázirleı alýy tıis. Sonymen qatar, oǵan zańnamalyq bastama kóterý jáne referendým ótkizýge usynys berý quqyǵyn enshileý basqarý júıesiniń ınstıtýsıonaldyq turaqtylyǵyn arttyrady.
Senator bir palataly Parlamentke kóshý týraly: Zań shyǵarýshy organnyń ókilettikteri qaıta qaraldy
«Biz usynyp otyrǵan ózgerister memlekettiń turaqtylyǵyna salynǵan uzaqmerzimdi ınvestısııa. Bul – bolashaq daǵdarystardyń aldyn alýǵa, qoǵam men bılik arasyndaǵy senimdi nyǵaıtýǵa jáne memlekettik basqarýdyń jańa arhıtektýrasyn qalyptastyrýǵa baǵyttalǵan sheshimder. Dana halqymyz «Aqylmen bastalǵan is – baıandy bolady» deıdi. Osy turǵyda, Halyq keńesi aqyl men jaýapkershilikke negizdelgen turaqty saıası qurylym. Ol Qazaqstandaǵy saıası mádenıettiń sapalyq jańa deńgeıine jol ashady», dep túıindedi oıyn depýtat.