Keler aıda Álibı Ydyrys aralas jekpe-jek álemindegi eń bedeldi promoýshen – UFC-degi tusaýkeser kezdesýin ótkizýge daıarlanyp jatyr.
Álibı 32 jasta. Sporttyń bul túrindegi mansabyn 2019 jyly bastaǵan. Sol ýaqyt aralyǵynda 11 kezdesý ótkizip, 10 ret jeńiske jetti. 6 básekede aıqyn basymdyq tanytty. Ol – túrli otandyq promoýshenderdiń asa jeńil salmaqtaǵy chempıondyq belbeýiniń ıegeri. Byltyr «The Ultimate Fighte» jarysynda baq synap, alǵashqy eki qarsylasyn esh kúmánsiz utty. О́kinishke qaraı, 17 tamyzda Chıkagoda uıymdastyrylǵan sońǵy jekpe-jeginde AQSh faıteri Djozef Moraleske (14-2) sabmıshn ádisimen jeńildi. Biraq soǵan qaramastan qandasymyzdyń óneri Dana Ýaıttyń kóńilinen shyǵyp, UFC-ge shaqyrtý aldy.
Álibı Ydyrys alǵashqy jekpe-jegin 22 aqpanda AQSh-tyń Tehas shtatynda Odı Osbornǵa qarsy ótkizedi. 9 qańtarda 34 jasqa tolǵan Iаmaıkanyń týmasy 2015 jyldan beri 22 ret oktagonǵa shyǵyp, 13 márte mereıi ústem boldy. 9 kezdesýdi merziminen buryn aıaqtady. 2023 jyldyń tamyz aıynda Odı Asý Almabaevpen aıqasty. Bul básekede bizdiń jigit ekinshi raýndta qarsylasyn qylqyndyryp tastady. Osborn byltyrǵy jazda aýstralııalyq Stıv Erseke upaı sanymen utyldy.