Elimizdiń premer-lıgasyndaǵy komandalar maýsymaralyq úzilisti barynsha tıimdi paıdalanyp, quramdaryn kúsheıtýge kiristi. Seleksııalyq jumysta, ásirese, el chempıony «Qaırat» pen bıik maqsattardy kózdegen «Aqtóbe» klýby erekshe belsendilik tanytyp otyr.
Byltyrǵy maýsymda tolaıym tabysqa jetip, ÝEFA Chempıondar lıgasynyń jalpy kezeńine joldama alǵan «Qaırat» Eýrododaǵa daıyndyqty bastap ketti. Almatylyq ujym Ońtústik Amerıkadan eki birdeı fýtbolshyny qataryna qosty. Birinshisi – brazılııalyq ortalyq qorǵaýshy Lýkas Afrıko. 30 jastaǵy oıynshy buǵan deıin Portýgalııanyń «Marıtımý», «Eshtorıl», Túrkııanyń «Vanspor» komandalarynda óner kórsetken. Sonymen qatar «Qaırat» 24 jastaǵy argentınalyq shabýylshy Sebastıan Sebalospen kelisimshartqa otyrdy. Bolıvııanyń «Real Orýro» klýbynda 40 oıynda 18 gol soǵyp, mergendigimen tanylǵan oǵlan almatylyqtardyń shabýyl shebin kúsheıtedi dep kútilip otyr. Klýbtyń basty maqsaty – chempıondyq ataqty qorǵap qalý, halyqaralyq arenada sátti óner kórsetý.
Byltyrǵy chempıonatty besinshi orynmen aıaqtaǵan «Aqtóbe» bıyl qalaıda bas júldeni oljalaýǵa bekingen syńaıly. Batysqazaqstandyq klýbtyń Lýısh Nanı men Mıralem Pıanıch syndy álemdik deńgeıdegi juldyzdardy qataryna qosýy múmkin degen aqparat jankúıerlerdi eleń etkizdi.
39 jastaǵy Lýısh Nanı Atlant muhıtyndaǵy aral-memleket Kabo-Verdede dúnıege kelgen. Erterekte Portýgalııaǵa qonys aýdarǵan soń, 2006–2017 jyldar aralyǵynda ulttyq komandanyń sapynda jasyndaı jarqyldady. 112 matchta qarsylastar qaqpasyn 24 márte dál kózdedi. Komandasymen birge Eýropa chempıony, Konfederasııa kýboginiń ıegeri atandy. Ár jyldary «Sportıng», «Manchester Iýnaıted», «Fenerbahche», «Valensııa» syndy áıgili komandalar sapynda oınady. Klýbtyq deńgeıdegi dodalarda 462 kezdesý ótkizip, 100-den asa gol soqty.
35 jastaǵy Mıralem Pıanıch – Bosnııa men Gersegovınanyń eń beldi fýtbolshysy. Amplýasy – jartylaı qorǵaýshy. 2008–2024 jyldar aralyǵynda túrli baıraqty básekelerde óz eliniń namysyn abyroıly qorǵap, 115 oıynda 18 gol soqty. Ár jyldary «Lıon», «Roma», «Iýventýs», «Barselona», «Beshıktash» syndy Eýropa grandtarynyń jeıdesin kıdi. Sol komandalar sapynda 499 márte alańǵa shyǵyp, 60 ret nysanany dál kózdedi.
Árıne, mundaı deńgeıdegi legıonerlerdi shaqyrý qomaqty qarajatty talap etetini belgili. Alaıda qos klýb ta aldaǵy maýsymda joǵary nátıjege qol jetkizý maqsatynda sanaly túrde táýekelge baryp otyr. Qyrýar qarjy men zor úmit artylǵan transferlerdiń qanshalyqty aqtalatynyn aldaǵy ýaqyt kórsetedi.