Memleket tarapynan aǵartýshy salaǵa aıryqsha qoldaý kórsetilip, qomaqty qarajat bólingenine qaramastan, Jambyl oblysynda áli kúnge deıin 1 apatty jáne 11 tozyǵy jetken, 17 oqýshy orny tapshylyǵy bar bilim ordasy tirkelgen. Toz-tozy shyqqan bilim ordasy shalǵaıdaǵy Moıynqum aýdanyna qarasty Kúshaman aýylynda ornalasqan.
Ras, keıingi jyldary Prezıdent bastamasymen qolǵa alynǵan «Keleshek mektepteri» ulttyq jobasynyń aıasynda óńirde boı kótergen zamanaýı bilim oshaqtarynyń sany artty. Ata-analardyń aıtýynsha, atalǵan mektepterdegi bilim sapasy kóńil kónshitetin kórinedi. Oqýshylardyń sapaly bilim alýyna barlyq jaǵdaı qarastyrylǵan. «Balanyń bári birdeı. Aýyl balasy men qala balasynyń bilim alý múmkindigi birdeı bolýy kerek. «Keleshek mektepteri» jobasynyń negizgi maqsaty da – osy» degen Prezıdent sózi oblys ortalyǵynan bólek aýdandarda is júzinde naqty kórinis tapqany rasynda da quptarlyq qadam.
Áıtse de óńirde boı kótergenine 73 jyl bolǵan Mánshúk Mámetova atyndaǵy bilim ordasy sekildi mektepter áli de barshylyq. 1951 jyly salynǵan bilim ordasynyń máselesi osy jyly sheshimin tabýǵa tıis. О́zge de talapqaı saı kelmeıtin oqý ordalarynyń jaı-kúıi jergilikti jurtty alańdatatyny ras.
О́ńirlerdegi aǵartý salasyndaǵy ózekti másele májilis qabyrǵasynda da aıtylǵany málim. Májilis depýtaty Muqash Eskendirov tozyǵy jetken mektep sanyn azaıtý máselesin shuǵyl túrde sheshýdiń mańyzy zor dep esepteıdi.
«Jambyl oblysynda tozyǵy jetken mektepter áli de barshylyq. Osy jyly óńirler úshin bıýdjetke sýbvensııa retinde 6 trln teńge qarajat bólinedi. Eki jyldyń bederinde ábden eskirgen bilim ordalarynyń máselesin tolyǵymen sheshken jón. Biz bul baǵytta qoldan kelgenshe ter tógýge ázirmiz», deıdi Májilis depýtaty.
Oblys ákimdigi bilim basqarmasynyń basshysy Nurbek Orshybekovtiń aıtýynsha, ótken jyly 11 bilim berý nysanyna 11 mlrd teńge kóleminde qarjy qarastyrylyp, kúrdeli jóndeý jumysy júrgizilgen. Sonymen qatar 26 mektep pen 14 balabaqsha jáne 1 arnaıy mektep aǵymdaǵy jóndeý jumysymen qamtylǵan.
«О́ńirde úsh aýysymdy mektep máselesi tolyǵymen sheshildi. Al qazirgi ýaqytta oblys aýmaǵynda 1 apatty, 11 tozyǵy jetken jáne oqýshy orny tapshylyǵy bar 17 mektep tirkelgen. Osy jyly 12 bilim berý nysanyn paıdalanýǵa berýdi josparlap otyrmyz. Sonyń arqasynda oqýshy orny tapshylyǵy bar 2 bilim ordasynyń, tozyǵy jetken 4 mekteptiń, sondaı-aq sport zaly men ashanasy joq 6 mekteptiń máselesi sheshiledi.
Budan bólek Moıynqum aýdanyna qarasty Kúshaman aýylyndaǵy Amangeldi atyndaǵy apatty mekteptiń ornyna 80 oryndyq jańa bilim berý nysanynyń qurylys jumysyn bastaýǵa nıettimiz. Osylaısha, shalǵaı aýyldaǵy ózekti máseleni sheshýge den qoıyp otyrmyz», deıdi basqarma basshysy.
Rasynda da Kúshaman aýylyndaǵy bilim ordasynyń jaǵdaıy kimdi de bolsa alańdatatyny anyq. Dál osy bilim ordasy men Mánshúk Mámetova atyndaǵy mekteptiń máselesi BAQ betinde talaı ret kóterilgeni málim. Sondyqtan osy eki mekteptiń problemasy osy jyly sheshilse, jergilikti jurt dán rıza bolatyny sózsiz. Qalaı bolǵan kúnde de ata-ana balasyn tozyǵy jetken bilim ordasyna bergisi kelmeıtini belgili ǵoı.
Ádette jaz mezgilinde aýyldardaǵy kóptegen mektepke kúrdeli jóndeý jumysy júrgiziletini barshaǵa belgili. Alaıda mıllıondaǵan tenderdi alǵan kompanııalar jumysty baıaýlatyp, bilim ordasy jańa oqý jylyna daıyn bolmaı jatady. Saldarynan aýyl oqýshylary mádenıet úılerinde oqýǵa májbúr bolady. О́ńirde jańadan boı kóteretin bilim ordalary da ýaqtyly aıaqtalmaı, jurttyń júıkesin juqartpasa eken deımiz.
Álbette, óńirdegi eskirgen mektepterdiń máselesin bir jylda tolyǵymen sheshý – qıynnyń qıyny. Oǵan qarjylyq múmkindik te joq shyǵar. Áıtkenmen, jambyldyq sheneýnikter aǵartý salasyndaǵy basty problemany tolyqtaı bıyl eńsermese de, aldaǵy jyly sheshse degen tilek bar.
Jambyl oblysy