Roza Baǵlanova atyndaǵy «Qazaqkonsert» memlekettik akademııalyq konserttik uıymynda belgili qobyzshy, Mádenıet salasynyń úzdigi Maqsat Medeýbektiń «Qobyz soul – dastur» atty konserti ótti.
Qobyz úninde tylsym syr bar. Ony tyńdaǵanda ǵasyrlar qoınaýyndaǵy babalardyń kóne sarynyn estigendeı bolasyń. Talantty ónerpazdyń keshinde osyndaı kúıdi bastan keshtik. Konsert barysynda jurtshylyq qobyzdyń baı tarıhymen tanysyp, jyly áserge bólendi. Sondaı-aq kesh ıesi Qorqyt, Yqylas, Táttimbettiń týyndylaryn naqyshyna keltirip tartty.
Jalpy, qobyz – túrki halyqtaryna ortaq mýzykalyq aspap. Sondyqtan bul konsertte tatar, qaraqalpaq, taǵy basqa túrki halyqtarynyń shyǵarmalary da oryndaldy.
Baǵdarlamanyń maqsaty – qobyz ónerin dáriptep, onyń oryndaýshylyq múmkindigin damytý. Buryn qobyzdy baqsylyq dástúrmen baılanystyratyn.
Maqsat Medeýbek búginde qobyz aspaby zamanaýı talapqa saı akademııalyq baǵytta damýda ekenin aıtty.
«Qazir qobyzben Antonıo Vıvaldı, Volfgang Amadeı Mosart, Iozef Gaıdn, Iogan Sebastıan Bah syndy álemge áıgili kompozıtorlardyń shyǵarmalaryn oryndaýǵa bolady. Sonymen qatar estradalyq janrda da qobyzdyń áleýeti zor. Bul aspap arqyly jeńil kaverlik týyndylardy oryndap, keń aýdıtorııaǵa nasıhattaýǵa múmkindik mol», deıdi ol.
Qysqasy, óner keshine kelgen kórermen daryndy qobyzshynyń oryndaýyndaǵy kúılerdi tyńdap, rýhanı demaldy.