Arqalyqta taǵy bir kópqabatty turǵyn úı paıdalanýǵa berildi. Qala ortalyǵyndaǵy jańa úıge birazdan beri baspana kezeginde turǵan kópbalaly otbasylar, múmkindigi shekteýli jandar, kámeletke tolǵan jetim balalar men zeınetkerler qonystandy.
Kópten beri bos turǵan 55 páterli nysandy jeke qurylys kompanııasy kúrdeli jóndeýden ótkizip, zaman talabyna saı qaıta qalpyna keltirgen. Qysqa ýaqyt ishinde jaıly baspanaǵa aınalǵan ǵımaratty jergilikti ákimdik 983 mln teńgege satyp aldy. Jańa úıdiń ıelerine páter kiltin tabystaý rásimine arnaıy kelgen qala ákimi Ámirhan Asanov kópshilikti qonystoı qýanyshymen quttyqtady.
«Halyqtyń ál-aýqatyn, turmystyq jaǵdaıyn jaqsartý maqsatynda kóp sharýa atqarylyp keledi. Osy baǵytta iske asyrylyp jatqan «Turǵyn úı-kommýnaldyq ınfraqurylymdy damytýdyń 2023–2029 jyldarǵa arnalǵan tujyrymdamasy» negizinde óńirde jyl saıyn myńdaǵan sharshy metr turǵyn úı salynyp, el ıgiligine berilip jatyr. Búgin, mine, bárimiz osyndaı ıgi istiń kýási bolyp otyrmyz. Arqalyqta áli de talaı turǵyn úı boı kóteredi. Bul baǵytta kóptegen joba josparda tur», dedi qala ákimi.
Saltanatty jıynda baspana qýanyshyna kenelgen elý bes otbasynyń atynan «Altyn alqa» ıegeri Ǵalııa Ysqaqova sóz alyp, qala basshylyǵy men qurylysshylarǵa alǵys aıtty. Qazaqtyń ıgi dástúrine saı ájeler shashý shashyp, qadirli qarııa, eńbek ardageri Quljan Súleımenov kópshilikke aq batasyn berdi.
Qostanaı oblysy