Astanada Musylman aqsaqaldar keńesiniń jáne sheıh Zaıd atyndaǵy «Adamzat baýyrlastyǵy» syılyǵynyń Bas hatshysy Muhammed Ábdelsalamnyń jańa kitaby kópshilikke tanystyryldy. «Rım Papasy Fransısk pen Ál-Azhardyń Joǵarǵy ımamy: kúrdeli jol – adamzattyń baýyrlastyǵy týraly qujattyń dúnıege kelýi» dep atalatyn bul eńbek qazaq tilinde jaryq kórdi.
Is-sharaǵa Parlament Senatynyń tóraǵasy, Álemdik jáne dástúrli dinder kóshbasshylary sezi hatshylyǵynyń basshysy Máýlen Áshimbaev, atalǵan kitaptyń avtory, Parlament depýtattary, dıplomattar, din ókilderi jáne qoǵam qaıratkerleri qatysty. M.Áshimbaev saltanatty rásimge qatysýshylarǵa iltıpat bildire kelip, Memleket basshysy Qasym-Jomart Toqaevtyń Jarlyǵymen Muhammed Ábdelsalam jahandyq deńgeıde konfessııaaralyq jáne mádenıetaralyq dıalogti nyǵaıtýǵa, Álemdik jáne dástúrli dinder kóshbasshylary seziniń ıdeıalary men maqsattaryn ilgeriletýge, sondaı-aq Qazaqstan men Ál-Azhar ýnıversıteti arasyndaǵy yntymaqtastyqty arttyrýǵa qosqan úlesi men osy joldaǵy tabandy ári júıeli eńbegi úshin I dárejeli «Dostyq» ordenimen marapattalǵanyn atap ótti.
Aıta ketsek, Prezıdent Musylman aqsaqaldar keńesiniń Bas hatshysy Muhammed Ábdelsalamdy qabyldaǵan edi. Senat tóraǵasy Memleket basshysy qazir adamzat buryn-sońdy bolmaǵan syn-qaterlermen betpe-bet kelip otyrǵanyn, geosaıası ahýal, mádenı jáne dinı alaýyzdyq, klımattyq daǵdarys pen áleýmettik teńsizdik ýshyǵa túskenin birneshe ret atap ótkenin de aıtty. Osyǵan baılanysty búginde baýyrlastyqqa bastaıtyn dıalog pen rýhanı dıplomatııanyń mańyzy arta tústi.
– Elimizde adamzattyń yntymaǵyn kózdeıtin bastamalarǵa únemi basa mán berilip keledi. Prezıdent Qasym-Jomart Toqaev mádenıetaralyq jáne órkenıetaralyq dıalogti damytýǵa úlken kóńil bólip otyr. Memleket basshysy atap ótkendeı, syndarly jáne ózara qurmetke negizdelgen dıalog – ornyqty damýdyń kepili. Sondyqtan elimiz álemdegi beıbitshilikti jáne senim men yntymaqtastyqty nyǵaıtýǵa arnalǵan bastamalardy dáıekti túrde qoldaıdy. Bul rette beıbitshilik pen dıalog mádenıetin ilgeriletýge jáne ózara túsinistik pen qoǵamdyq kelisimdi nyǵaıtýǵa úndeıtin jobalardyń mańyzy zor, – dedi M.Áshimbaev.
Sonymen qatar Senat tóraǵasy 2019 jyly qabyldanǵan «Adamzattyń baýyrlastyǵy týraly qujat» barsha adam balasyn ortaq qundylyqtarǵa taban tirep, beıbit qatar ómir súrýge shaqyrǵan biregeı úndeý bolǵanyn atap ótti. Kópshilikke tanystyrylǵan kitapta sol tarıhı qujattyń mán-mańyzyn tereń túsindiretin tyń oılar, saraptamalyq tujyrymdar jáne fılosofııalyq paıymdaýlar júıelenip berilgen.
Eńbek qazaqtildi oqyrmandarǵa alǵash ret usynylyp otyr. M.Áshimbaev bul qadam elimizdiń jahandyq deńgeıde beıbitshilik pen kelisimdi nyǵaıtý jolynda mańyzdy rólge ıe ekenin kórsetetinin aıtyp ótti. Buǵan elimizdiń bastamasymen turaqty ótkizilip kele jatqan Álemdik jáne dástúrli dinder kóshbasshylarynyń sezi jáne qazaq jerinde kóptegen etnos ókilderiniń tatý-tátti ómir súrip otyrǵany aıqyn dálel bolady. Sondyqtan jańa kitap Qazaqstannyń dinaralyq dıalogti nyǵaıtý baǵytyndaǵy tájirıbesin odan ári dáripteýge úles qospaq.
Is-shara barysynda kitap avtory Muhammed Ábdelsalam adamzattyń baýyrlastyǵyn kózdeıtin bastamaǵa qoldaý bildirgeni úshin alǵys bildirdi. Sondaı-aq kezdesýde Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, memleket jáne qoǵam qaıratkeri Ádil Ahmetov, Qasıetti Taqtyń Qazaqstan Respýblıkasyndaǵy Apostoldyq nýnsıi Djordj Panamtýndıl jáne Konfessııaaralyq jáne dinaralyq dıalogtiń halyqaralyq ortalyǵynyń basqarma tóraǵasy Gúlsana Qojabaı sóz sóıledi.